ҺАВА ТОРЫШЫ +4 oC

Яңалыклар

барлык хәбәрләр Татарстан Россия

Татар дөньясы

Бүген Истанбул татарлары Татарстан Президенты белән очрашырга әзерләнә

15 май 2019, 09:07

Очрашуда татар галиме Надир Дәүләт белән Садри Максуди оныгы Гөнүл Пултар да чыгыш ясый.

(Истанбул, 15 май, “Татар-информ”, Рушания Алтай). Бүген Татарстан Президенты Рөстәм Миңнеханов кичке якта Истанбул татарлары белән очрашачак. Анда Бөтендөнья татар конгрессы Милли Шура рәисе Васил Шәйхразиев тә катнаша. Бу турыда "Татар-информ"ның Төркиядәге үз хәбәрчесенә Татарстанның Төркиядәге вәкаләтле вәкиле Айрат Гатауллин хәбәр итте.

Программада Истанбул татарлары вәкилләренең сәламләү чыгышлары булачак. Шулай ук тарих галиме, профессор Надир Дәүләт, Садри Максудинең оныгы, филология фәннәре кандидаты Гөнул Пултар, Мармара университеты галимәсе Ләйсән Шахин чыгыш ясаячак.

Очрашуга Төркия югары уку йортларында белем алучы Татарстан студентлар да чакырылган. Президент белән күрешү кичәсендә 40 кеше катнашачак. Исемлектә Идел-Урал төрекләре мәдәният һәм ярдәмләшү җәмгыяте рәисе Гөлтән Ураллы сайлаган кешеләр урын алган. Очрашу 40 минут дәвам итәчәк дип билгеләнгән.

Татарстан Президентының Истанбул татарлары белән очрашуы Төркиягә рәсми эш сәфәре кысаларында оештырылган. Рөстәм Миңнехановның иртәнге якта Бурса шәһәрере җитәкчелеге белән очрашуы һәм Төркиянең кайбер сәнәгать оешмалары белән танышуы каралган. Шулай ук Төркиянең яңа төзелгән иң зур “Чамлыҗа” мәчетен дә карап чыгуы көтелә.

Айрат Гатауллин әйтүенчә, иртәгә Татарстан Президенты Төркия сәүдә министры Рухсар Пәкҗан белән очрашачак, алга таба алар икесе “Татарстан-Төркия” эшлекле форумына катнашачаклар. Рөстәм Миңнехановның шулай ук Истанбул губернаторы Али Йерликая белән күрешүе, Ислам мәдәнияте һәм сәнгатен өйрәнү институты ИРСИКА эшчәнлеге белән танышуы каралган.
 


Безгә Telegramда язылыгыз

Әгәр хата күрсәгез, текстны билгеләгез һәм Ctrl + Enter төймәләренә басыгыз

Фикерләр




Бик мөһим һәм кызыклы хәлнең шаһиты булдыгызмы? Редакциягә хәбәр итегез!

+7 927 037-91-10