ҺАВА ТОРЫШЫ +20 oC

Яңалыклар

барлык хәбәрләр Татарстан Россия

Мәдәният

Ирада Әюпова Татар китабы йорты һәм аның яңа директоры белән таныштырды

14 май 2019, 14:06 , Фото: Салават Камалетдинов

Ирада Әюпова Татар китабы йорты һәм аның яңа директоры белән таныштырды
Татар китабы йортында китап кибете, медиа-үзәк, типография, экспозиция заллары, китапханә һәм башкалар урын алган.

(Казан, 14 май, «Татар-информ», Рузилә Мөхәммәтова). Татарстан мәдәният министры Ирада Әюпова һәм Татарстан Милли музее генераль директоры Гөлчәчәк Нәҗипова журналистларга Татар китабы йортының яңа директоры Луиза Янсуарны тәкъдим итте. Бүген ТР Мәдәният министрлыгында Татар китабы йорты ачылуга багышланган матбугат конференциясе оештырылды.

Ирада Әюпова журналистларны Татар китабы йортына директор итеп билгеләнгән шагыйрә Луиза Янсуар белән таныштырып үтте. Аны сайлаганда иҗади кеше булуына игътибар ителүен ассызыклады.

“Ниһаять, Шәриф Камал музее бинасы реконструкцияләнеп файдалануга тапшырылды. Аның музеефикация эшләре дә тәмамланып килә. Без хәзер тагын бер мәдәни үзәгебезне булдырдык”, - дип бина белән таныштырды Гөлчәчәк Нәҗипова. Ул Шәриф Камал мемориаль фатирын үз эченә алган музейга Татар китабы йорты исемен Ренат Харис һәм Разил Вәлиев тәкъдим итүен искәртеп үтте.

Луиза Янсуар (Шарова) Татар китабы йортының концепциясе, максатлары һәм бурычлары белән таныштырды.

“Ни өчен нәкъ менә Шәриф Камалның музее ачылган булуын мин заманында аның фатирының замандашлары өчен ачык булуыннан күрәм. Биредә Кәрим Тинчурин, Кави Нәҗми, Гази Кашшаф, Муса Җәлил, Гадел Кутуй, Фатих Кәрим кебек язучылар, Салих Сәйдәшев, Мансур Мозаффаров кебек композиторлар җыелган”, - дип аңлатты ул.

Татар китабы йортында китап кибете, медиа-үзәк, типография, экспозиция заллары, китапханә һәм башкалар урын алган.
 

 


Безгә Telegramда язылыгыз

Әгәр хата күрсәгез, текстны билгеләгез һәм Ctrl + Enter төймәләренә басыгыз

Фикерләр




Бик мөһим һәм кызыклы хәлнең шаһиты булдыгызмы? Редакциягә хәбәр итегез!

+7 927 037-91-10