ҺАВА ТОРЫШЫ +22 oC

Яңалыклар

барлык хәбәрләр Татарстан Россия

Спорт

Актаныш юл ярышы катнашучылары буенча абсолют рекорд куйды

3 май 2019, 09:00 , Фото: aktanysh-rt.ru

Актаныш юл ярышы катнашучылары буенча абсолют рекорд куйды Быел юлсыз юл ярышының трассасы да үзгәрешләр кичергән.

(Актаныш, 3 май, "Татар-информ", "Актаныш-информ", Лилия Бәхтиева). Актаныш райнының Иске Байсар җирлеге территориясендә дүртенче тапкыр оештырылучы "ДЖИП СПРИНТ 116" исеме алган юлсыз юл ярышы катнашучылар һәм тамаша кылучылар саны буенча абсолют рекорд куйды. Бу турыда җирле басма хәбәр итә.

Быел Актаныш, Яр Чаллы, Зәй, Минзәлә, Мөслим, Түбән Кама, күрше Башкортстан, Удмуртия республикаларыннан гына түгел, Пермь, хәтта Екатеринбургтан килгән катнашучылар да бар иде – география киңәя, дан тарала, юлсыз юлда ярышучыларны тамаша кылучылар арта.

Сүз уңаеннан, бүгенге ярышка килүчеләр саны да мең генә түгел иде – Сабантуй бер читтә торсын!

Район башлыгы Энгель Фәттахов та халык белән бергә тамаша кылды бу әкәмәтне.

- Күпләр кызу язгы чәчү өстендә нинди ярыш ул дияргә дә мөмкин. Әмма Актаныш районында язгы чәчү бернинди тоткарлыксыз, уңышлы дәвам итә. Бүгенге көнгә 75% мәйданда ул инде башкарылган. 

Быел юлсыз юл ярышының трассасы да үзгәрешләр кичергән. Язның шактый иртә килүе, җирнең ярыйсы ук кибеп бетүе дә оештыручыларга күпмедер өстәмә мәшәкать тудырган - экстремаль шартлар булдырыр өчен махсус сулыклар, баткак урыннар да ясарга туры килгән.


Безгә Telegramда язылыгыз

Әгәр хата күрсәгез, текстны билгеләгез һәм Ctrl + Enter төймәләренә басыгыз

Фикерләр




Бик мөһим һәм кызыклы хәлнең шаһиты булдыгызмы? Редакциягә хәбәр итегез!

+7 927 037-91-10