ҺАВА ТОРЫШЫ +19 oC

Яңалыклар

барлык хәбәрләр Татарстан Россия

Дин

Татарстан мәчетләрендә татар теле курслары төгәлләнә

29 апрель 2019, 19:07 , Фото: dumrt.ru

Татарстан мәчетләрендә татар теле курслары төгәлләнә Мөфти шәһадәтнамәләрне үзе тапшырачак.

(Казан, 29 апрель, "Татар-информ").  Иртәгә, 30 апрельдә, Татарстанның 20 мәчетендә татар теле курслары төгәлләнә. Бу хакта ТР Диния нәзарәтенең матбугат хезмәте хәбәр итә. 

Ярты елга исәпләнгән әлеге бушлай курслар 2018 елның 1 октябреннән Казанның 5 мәчетендә һәм Татарстанның 15 районында – Яр Чаллы, Түбән Кама, Әлмәт, Бөгелмә, Лениногорск, Алабуга, Яшел Үзән, Ютазы, Чистай, Спас, Норлат, Менделеевск, Югары Ослан, Алексеевск, Әгерҗе мөхтәсибәтләрендә уздырылды.

Башкаланың «Тынычлык», «Ризван», «Гаилә», «Ярдәм», «Әниләр» мәчетләре каршында оештырылган курсларны ябу тантанасы иртәгә 17.00дә ТР мөселманнары Диния нәзарәте резиденциясендә үтәчәк. Тыңлаучыларга үзләштерелгән белем күләме нигезендә сертификатларны Татарстан мөфтие Камил хәзрәт Сәмигуллин үзе тапшырачак. Бөтен республика буенча татар теленә өйрәнү курсларын башыннан ахырына кадәр барлыгы 425 кеше тәмамлый. Курсларга якынча 600 кеше йөрде.

Татар теле курслары Татарстан мөфтие Камил хәзрәт Сәмигуллин башлангычы белән ТР мөселманнары Диния нәзарәте тарафыннан икенче тапкыр оештырылды. Дәресләр атнасына ике тапкыр уздырылды. Аларны югары белемле филологлар, тәҗрибәле татар теле укытучылары алып барды.

Укыту процессында Татарстан мөселманнары Диния нәзарәте һәм «Хозур» нәшрият йорты тарафыннан, Россия ислам институтының татар теле һәм милли мәдәният кафедрасы белгечләре белән берлектә әзерләнгән «Татар теле. Башлап өйрәнүчеләр өчен» дәреслеге файдаланылды. Моннан тыш, теләүчеләр өчен өстәмә ислам дине мәдәнияте белән танышу мөмкинлеге дә каралган иде. Курслар 48 академик сәгатькә исәпләнде.

Курсларның беренчесе 2018 елның февраль – апрель айларында Татарстанның 10 мәчетендә оештырылган иде.


Безгә Telegramда язылыгыз

Әгәр хата күрсәгез, текстны билгеләгез һәм Ctrl + Enter төймәләренә басыгыз

Фикерләр




Бик мөһим һәм кызыклы хәлнең шаһиты булдыгызмы? Редакциягә хәбәр итегез!

+7 927 037-91-10