ҺАВА ТОРЫШЫ +10 oC

Яңалыклар

барлык хәбәрләр Татарстан Россия

Җәмгыять

Татарстанда мартның соңгы атнасы җылы булачак

22 март 2019, 19:26 , Фото: архив/Рамиль Гали, Султан Исхаков

Татарстанда мартның соңгы атнасы җылы булачак Республиканы атлантик циклон сериясеннән тотрыксыз һава шартлары көтә.

(Казан, 22 март, «Татар-информ», Егор Никитин). Якындагы көннәрдә Татарстанда тотрыксыз һава торышы булачак. Төнлә температура нульдән түбән булса, көндез нульдән югары булачак. Шул ук вакытта мартның соңгы декадасында нормадан җылырак булачак. Бу турыда Татарстан Гидрометеорология үзәгенең метеофаразлар бүлеге җитәкчесе Ирина Трущина сөйләде.

Аның сүзләренчә, республикада мартның күпчелек көннәрендә атлантик циклон аркасында аномаль җылы булды. Атлантикадан килгән һава массасы төбәккә төньяктан салкын һава кертми. Март азагында температура шулай ук нормадан 3 градуска югары булачак.

«Мартның беренче декадасында температура нормадан уртача 5 градуска югары булды, икенче декадада – 4 градуска», — диде Ирина Трущина.

Якындагы көннәрдә циклоннар аркасында республикада тотрыксыз һава торышы булачак. Урыны белән юеш кар һәм яңгыр явуы көтелә. Шимбә көнне төнлә һәм иртән Татарстанның кайбер районнарында бозлавык булырга мөмкин.

«Температура төнлә -5 градуска кадәр төшәчәк, ә көндез +6 градуска кадәр күтәреләчәк. Дүшәмбе республикада буран, секундына 18 метрга кадәр җил булырга мөмкин», — дип кисәтте Татарстан Гидрометеорология үзәгенең метеофаразлар бүлеге җитәкчесе.

Ирина Трущина шулай ук республикада апрельдән алып ноябрьгә кадәр һава торышын әйтте. Бу чорда Татарстанда температура норма кысаларында булачак. Бары тик августта гына нормадан җылырак булачак. Явым-төшем дә узган еллардагы кебек, бары тик июньдә генә аз булуы көтелә.

 


Безгә Telegramда язылыгыз

Әгәр хата күрсәгез, текстны билгеләгез һәм Ctrl + Enter төймәләренә басыгыз

Фикерләр




Бик мөһим һәм кызыклы хәлнең шаһиты булдыгызмы? Редакциягә хәбәр итегез!

+7 927 037-91-10