ҺАВА ТОРЫШЫ -9 oC

Яңалыклар

барлык хәбәрләр Татарстан Россия
×

Фән һәм мәгариф

Дәүләт имтиханнарын үткәрүдә катнашучы педагогларга компенсация түләнәчәк

5 март 2019, 17:29 , Фото: архив/Салават Камалетдинов

Дәүләт имтиханнарын үткәрүдә катнашучы педагогларга компенсация түләнәчәк Компенсация күләме сәгатенә 19 сум 28 тиен тәшкил итә.

(Казан, 5 март, “Татар-информ”, Гөлнар Гарифуллина). Быел Бердәм дәүләт, Төп дәүләт имтиханнары, 9 һәм 11 сыйныфлар өчен дәүләт чыгарылыш имтиханнарын уздыруда катнашачак педагогларның барысына да компенсация түләнәчәк. Бу хакта ТР Министрлар Кабинетында брифингта Татарстан вице-премьеры - мәгариф һәм фән министры Рафис Борһанов әйтте.

“2019 елгы дәүләт йомгаклау аттестациясенең мөһим яңалыгы – ТР Министрлар Кабинетының “Бердәм дәүләт имтиханына әзерлек һәм уздыру эше өчен педагогик хезмәткәрләргә компенсацияләр турында” Карарына үзгәрешләр кертелүе”, - диде министр. Ул барлык төр дәүләт имтиханнарын уздыруга үз өлешен кертәчәк укытучыларга компенсация түләнәчәген әйтте.

Рафис Борһанов компенсация күләме сәгатенә 19 сум 28 тиен тәшкил итүен белдерде. “Кемгәдер аз, кемгәдер күп тоелырга мөмкин, ләкин аның булуы бик яхшы”, - диде министр.

1 мартка булган мәгълүматлардан күренгәнчә, быел урта гомуми белем программалары буенча дәүләт йомгаклау аттестациясен яки Бердәм дәүләт имтиханын 17816 кеше тапшырачак.

Сынау алдында торган укучыларның 16395е - мәктәпне быел тәмамлаучы чыгарылыш укучылары, урта һөнәри белем оешмаларында укучы - 329 кеше, узган елларда мәктәпне тәмамлаган - 1086 кеше һәм сәламәтлек мөмкинлекләре чикле - 244 бала. Былтыр БДИны республикада 16,6 мең укучы тапшырган.

9 нчы сыйныфны тәмамлап, рус теленнән төп дәүләт имтиханын 36 мең 878 кеше, математикадан 36 мең 871 кеше тапшырыр дип көтелә.

 


Безгә Telegramда язылыгыз

Әгәр хата күрсәгез, текстны билгеләгез һәм Ctrl + Enter төймәләренә басыгыз

Фикерләр




Бик мөһим һәм кызыклы хәлнең шаһиты булдыгызмы? Редакциягә хәбәр итегез!

+7 927 037-91-10