ҺАВА ТОРЫШЫ +22 oC

Яңалыклар

барлык хәбәрләр Татарстан Россия

Дин

Диния нәзарәте Милли Шурага Татар халкының үсеш стратегиясе буенча тәкъдимнәрен юллады

21 февраль 2019, 16:04 , Фото: dumrt.ru

Диния нәзарәте Милли Шурага Татар халкының үсеш стратегиясе буенча тәкъдимнәрен юллады Бүген ТР мөселманнары Диния нәзарәте Президиумының чираттагы утырышы узды.

(Казан, 21 февраль, "Татар-информ"). ТР Диния нәзарәте Президиумы Милли Шурага Татар халкының үсеш стратегиясе буенча тәкъдимнәрен юллады, дип хәбәр итә нәзарәтнең матбугат хезмәте.

Бүген ТР мөселманнары Диния нәзарәте Президиумының чираттагы утырышы узды. Чарада Татарстан мөфтие Камил хәзрәт Сәмигуллин, республиканың баш казые Җәлил хәзрәт Фазлыев, мөфти урынбасарлары Рәфикъ хәзрәт Мөхәммәтшин, Илфар хәзрәт Хәсәнов, Мансур хәзрәт Җәләлетдинов, шулай ук нәзарәтнең Аксакаллар шурасы рәисе Айрат хәзрәт Әюпов һәм Президиум әгъзалары итеп сайланган имам-мөхтәсибәтләр катнашты.

Көн тәртибендәге төп сорауларның берсе булып Татар халкының үсеш стратегиясендә исламның катнашын көчәйтү максатыннан әлеге документны эшләүчеләргә рәсми мөрәҗәгатьне кабул итеп җибәрү иде. Президиум әгъзаларын иң борчыганы – бу стратегиянең беренчел эскизларында татар халкын саклау факторы буларак ислам диненең игътибардан чыгарылуы.

«Россиядәге 85 Диния нәзарәтенең күпчелек өлешен татар Диния нәзарәтләре тәшкил итә, илдәге 8 мең мәчетнең 4 меңгә якыны – шулай ук татар мәчетләре. Минемчә, боларны исәпкә алырга кирәк. Татарны элек-электән дин саклап килгән. Максатыбыз – дини оешмаларны татар милләтен саклауга җәлеп итү. Хәзерге вакытта Татарстаннан читтә урнашкан төбәкләрдә татар мәктәпләре ябыла, мәчетләрдән кала, милләтебезне тагын нәрсә саклый ала соң?», – дип билгеләп узды Рәфикъ хәзрәт Мөхәммәтшин.

Президиум әгъзалары шулай ук бүгенге көндә татарларны бары тик туган тел тирәсендә генә берләштерү мөмкин түгел, дигән фикердә тора – милләттә татар телен белү һәм куллану даирәсе бик тар. Ислам исә чит төбәкләрдә һәм илләрдә яшәүче татар гаиләләрендә сакланган. Димәк, ислам – татар халкын берләштерүдә беренчел факторга ия, дип басым ясады алар. 

Мөрәҗәгатьтә Статегия проектын әзерләү эшчәнлегенә җәлеп ителгән иҗтимагый институтлар исемлегенә ТР Диния нәзарәтен, төбәк мөфтиятләрен һәм мөселман дини оешмаларны кертү, документның программалы базасына «Ислам һәм татар дөньясы» концепциясен һәм «Нигезләмә»не өстәү, стратегиянең рухи базасын исламның Хәнәфи мәзһәбе һәм Матуриди гакыйдәсе яссылыгында карау, мөселман дөньясы белән якынаю һәм башка тәкъдимнәр урын алган.

 

 


Безгә Telegramда язылыгыз

Әгәр хата күрсәгез, текстны билгеләгез һәм Ctrl + Enter төймәләренә басыгыз

Фикерләр




Бик мөһим һәм кызыклы хәлнең шаһиты булдыгызмы? Редакциягә хәбәр итегез!

+7 927 037-91-10