ҺАВА ТОРЫШЫ +10 oC

Яңалыклар

барлык хәбәрләр Татарстан Россия

Татар дөньясы

Бүген күренекле татар язучысы Әмирхан Еники каберенә зиярәт кылынды

15 февраль 2019, 13:52 , Фото: Зилә Мөбәрәкшина

Бүген күренекле татар язучысы Әмирхан Еники каберенә зиярәт кылынды Әдипнең бакыйлыкка күчкән көненә туры китереп, җомга көнендә рухына багышлап дога укылды.

(Казан, 15 февраль, “Татар-информ”, Зилә Мөбәрәкшина). Бүген Татарстанның Язучылар берлеге һәм КФУның Филология һәм мәдәниятара багланышлар институтының Г.Тукай исемендәге Милли мәдәният һәм мәгариф югары мәктәбе студентлары татар язучысы Әмирхан Еникинең каберен зиярәт кылды. Бу хакта “Татар-информ”га КФУның татар әдәбияты кафедрасы мөгаллиме Гөлфия Гайнуллина хәбәр итте.

Татар әдәбияты классигы, бөек язучы Әмирхан Еникинең тууына 2 мартта (иске стиль белән 17 февральдә) 110 ел тулган булыр иде. Язучының юбилеенә мөнәсәбәтле чаралар 12 февральдә киң җәмәгатьчелек катнашында Г.Камал исемендәге Татар Дәүләт академия театрында әдәби-музыкаль кичә белән башланды. Иске татар зиратында бүген әдип рухына багышлап дога кылынды.

Вакыйгада Татарстанның Дәүләт Советы депутаты Разил Вәлиев, Әмирхан Еникинең оныгы Рөстәм Тюменев-Еники, Язучылар берлеге рәисе Данил Салихов, берлек урынбасары Рамис Аймәт, күренекле татар язучылары Галимҗан Гыйльманов, Марсель Галиев, Әхәт Гаффар һ.б. катнашты.

Әдәбият галимнәре татар әдәбиятының икенче яртысы Әмирхан Еники эпохасы буларак бәяләнә ала, дигән карашта. Язучылар Әмирхан Еникинең татар әдәбиятындагы урыны алыштыргысыз икәнен билгеләп үтте. КФУ мөгаллиме Гөлфия Гайнуллина бу чара Әмирхан Еникинең 110 еллыгына багышлап планлаштырылган гамәлләрне башлар алдыннан әдипнең рухына якты сүз, диде.

Чарада катнашкан студентлар Казан федераль университетының Филология мәдәниятара багланышлар институтында Әмирхан Еники иҗаты тирәнтен өйрәнелә диде.
 


Безгә Telegramда язылыгыз

Әгәр хата күрсәгез, текстны билгеләгез һәм Ctrl + Enter төймәләренә басыгыз

Фикерләр




Бик мөһим һәм кызыклы хәлнең шаһиты булдыгызмы? Редакциягә хәбәр итегез!

+7 927 037-91-10