ҺАВА ТОРЫШЫ +16 oC

Яңалыклар

барлык хәбәрләр Татарстан Россия

Мәдәният

Разил Вәлиев “Җырчы казлар” әкиятен татар халкының язмышына тиңләде

7 декабрь 2018, 22:10 , Фото: Салават Камалетдинов

Разил Вәлиев “Җырчы казлар” әкиятен татар халкының язмышына тиңләде "Җырчы казлар" китабын төзүдә сәнгать мәктәбе укучылары ярдәм иткән.

(Казан, 7 декабрь, "Татар-информ", Гөлия Хәсбиуллина). Бүген ТР Милли китапханәсенең Зур уку залында "Дөнья халыклары әкиятләре" җыентыгын тәкъдим итү кичәсендә китапны төзүче һәм әкиятләрне татарчага тәрҗемә итүче, Татарстанның халык шагыйре Разил Вәлиев “Җырчы казлар” әкиятен татар халкының язмышына тиңләде.

"Әкияттә аучы казны атып төшерә, аны йолкыйлар, пешерәләр, ә ул һаман җырлый. Аның җырлаган тавышын ишетеп, башка казлар килә һәм аны күтәреп алып китәләр һәм каз яңадан терелә. Бу, күпмедер дәрәҗәдә, безнең халыкның язмышына охшаган. Бүгенге көндә һич кенә дә төшенкелеккә бирелергә кирәкми. Бер-беребезне якласак, без беркайчан да үлмибез", - диде бу хакта Разил Вәлиев.

"Җырчы казлар" китабын Казан шәһәренең 6нчы сәнгать мәктәбе укучылары ясаган 154 рәсем бизи. Рәсем ясаган укучылар үзләре дә кичәдә катнашты. Алар китап битләрендә үз рәсемнәрен күреп сөенүләре турында әйттеләр.

Кичәдә китапның бизәлеш мөхәррире - Россия Федерациясенең атказанган рәссамы Григорий Эйдинов та катнашты. Ул бу китапның рус телендә дә тәрҗемәсен күрү теләген белдерде.

Әдәби-музыкаль чарада мәктәп һәм гимназия баларының иҗади чыгышлары да булды. Шулай ук, кичәдә Татарстанның халык артистлары Хәлим Җәләй, Луара Шакирҗан һәм театр училищесы студенты Валерий Антонов тарафыннан китапка кергән әкиятләрнең берничәсе яңгырады.

Разил Вәлиев тәрҗемә иткән әкиятләр күп еллар "Ялкын" журналында басыла. Кичәдә, ул әкиятләрне укып, берничә буын үскәнен, һәм ул әсәрләрнең бик зур әһәмияткә ия булуларын әйтеп, язучыга рәхмәт сүзләре белдерделәр.


 


Безгә Telegramда язылыгыз

Әгәр хата күрсәгез, текстны билгеләгез һәм Ctrl + Enter төймәләренә басыгыз

Фикерләр




Бик мөһим һәм кызыклы хәлнең шаһиты булдыгызмы? Редакциягә хәбәр итегез!

+7 927 037-91-10