ҺАВА ТОРЫШЫ +20 oC

Яңалыклар

барлык хәбәрләр Татарстан Россия

Җәмгыять, Фән һәм мәгариф

Чирмешән районының Югары Чегодай авылында яшәүче 10 яшьлек малайга бүләкләр китергәннәр

8 август 2018, 08:00 , Фото: nashcheremshan.ru/

Чирмешән районының Югары Чегодай авылында яшәүче 10 яшьлек малайга бүләкләр китергәннәр Бу ярдәм “Мәктәпкә җыенырга ярдәм ит“ акциясе кысаларында күрсәтелгән.

(Чирмешән, 8 август, “Татар-информ“, “Безнең Чирмешән“, Кадрия Гамирова). “Изге йөрәк” халыкка комплекслы социаль хезмәт күрсәтү үзәгенең гаиләгә һәм балаларга социаль ярдәм күрсәтү бүлекчәсе хезмәткәрләре мөмкинлеге чикле малай һәм кызларга күңелле мизгелләр бүләк итүләрен дәвам итәләр. “Балаларга ирекле ярдәм күрсәтүчеләр” акциясе кысаларында август аенда алар Югары Чегодай авылында яшәүче Илсур Моратшинны котладылар, дип яза җирле басма.

-Илсурны 10 яшь тулу уңаеннан гаиләбез белән тәбрикләгән идек, ә бусы көтелмәгән бүләк булды, - ди әнисе Елена. - Улыбызга сюрприз ясаганыгыз өчен зур рәхмәт. “Мәктәпкә җыенырга ярдәм ит!” акцияләре кысаларында да ел саен ярдәм алабыз, рәхмәтләребез чиксез. Әле быел да уку кирәк-яраклары белән мәктәп сумкасы бирделәр, улыбыз моңа бик куанды.

Илсурның туган көне бүләк автомобильләргә бай булды: автомобиль формасындагы шар, автомашина ясалган торт һәм пульт белән идарә ителә торган автомобиль. Әти-әниләре улларына велосипед бүләк иткәннәр.

Арабызда мәрхәмәтле кешеләр күп. Әккәрәйдән Галина Маркелова Илсурны һава шарлары белән шатландырды, Римма Әхмәтшина бу туган көнгә зефир пешереп килгән, ә Альбина Әхмәдова тәмле дә, матур да торт ясаган.

-Бу кызларга без бик рәхмәтле, алар һәрвакыт балаларны куандырырга әзер, - диләр үзәк хезмәткәрләре. - Ярдәм итәргә теләүче башка иганәчеләрне дә көтеп калабыз.

Илсур Лашмандагы коррекцион мәктәптә укый, бу уку елында 4нче класска бара. Ул буш вакытларында укырга ярата, компьютерда да үзенә шөгыль таба, урамда иптәшләре белән качышлы да уйный. Хәзер яңа велосипедында йөрергә өйрәнә.

 


Безгә Telegramда язылыгыз

Әгәр хата күрсәгез, текстны билгеләгез һәм Ctrl + Enter төймәләренә басыгыз

Фикерләр




Бик мөһим һәм кызыклы хәлнең шаһиты булдыгызмы? Редакциягә хәбәр итегез!

+7 927 037-91-10