ҺАВА ТОРЫШЫ +17 oC

Яңалыклар

барлык хәбәрләр Татарстан Россия

Авыл

Россельхознадзор кош гриппының беренче билгеләрен атады

17 июль 2018, 15:01 , Фото: архив/Рамиль Гали, Салават Камалетдинов

Россельхознадзор кош гриппының беренче билгеләрен атады “Йорт кошларының грипптан үлү ихтималы 80-100 процент”, - диде Идрис Гатин.

(Казан, 17 июль, “Татар-информ”, Чулпан Шакирова). Ветеринария һәм фитосанитария күзәтчелеге буенча федераль хезмәт (Россельхознадзор) идарәсе бүген “Татар-информ”да узган матбугат чарасында кош гриппының беренче билгеләрен атады һәм санитария таләпләре турында аңлатты.

“Кош-корт сатып аласыз икән, аларны ким дигәндә 10-12 көн карантинда, ягъни башка кошларга кушмыйча тотарга кирәк. Безнең халык нишли? Бройлер чебиләр алып кайта да, кетәклеккә җибәрә. Каз да шунда, үрдәк тә, тавык та, - диде Россельхознадзор идарәсенең дәүләт ветеринария күзәтчелеге бүлеге башлыгы Идрис Гатин. – Икенчедән, кош-корт алганда сатучыдан документларын таләп итәргә кыенсынмагыз. Кош-корт каян китерелгән, нинди фабрикадан, инкубатор хуҗасы кем, нинди күкәйдән чыккан, нинди вакциналар ясалган, нинди ветеринария эшкәртү процесслары узган? Бу – көлке түгел, авыз бер тапкыр пешкәч кенә өреп кабарга өйрәнгән без".

  • Узган ел Лаеш кошчылык фабрикасында кош гриппы табылган иде.

"Лаештан кош-корт алучылар әле бүген дә фабрика белән судлашып йөри. Мәсәлән,  “Яруллин” крестьян-фермер хуҗалыгы 100 мең сумлык зыян ясады үзенә. Судлар да булды, оттырдылар. Шуңа күрә, товар алган вакытта игътибарлы булырга кирәк. Кибеткә керсәк, азык-төлекне җитештерүчене дә, яраклылык вакытын да карыйбыз бит. Ә нигә 10, 20, 30 мең сумга кош-корт, хайванны бик җиңел генә алабыз. “Әйдә, тартмага сал” дибез дә, акчасын биреп, китеп барабыз. Бу бит чир дигән сүз. Кош гриппы - аеруча куркыныч вирус. Азык-төлек сатып алганда да игътибарлы булу соарада, һәр нәрсәнең документын карарга кирәк", - диде Гатин.

Идрис Гатин кош гриппының билгеләрен аерым басым ясап атады.

  • “Кош гриппының беренче билгеләре: йокымсырау, кикрикләр зәңгәрләнү, кош-кортның йөреше үзгәрү, эче китү, температурасы күтәрелү һәм гырылдый башлау. Соң чиктә  – үлем. Бүген бер чеби, өч көннән соң тагын берсе үләргә мөмкин. Йорт кошларының грипптан үлү ихтималы 80-100 процент".

Дәүләт ветеринария күзәтчелеге бүлеге башлыгы Чувашстаннан хәбәрләр килеп торганын да әйтте. "Биредә бер атна эчендә 50-60 баш кош-корт үлгән очраклар бар. Авыруның максималь инкубация периоды 21 көн дибез. Күп очракта авыру 1-7 көннәрдә беленә башлый. Алда саналган билгеләр кош-кортта беренче көндә үк күзәтелергә мөмкин. Ә бер атна дигәндә инде, кош-кортның яртысы үлеп бетә”, - диде бүлек башлыгы.


Безгә Telegramда язылыгыз

Әгәр хата күрсәгез, текстны билгеләгез һәм Ctrl + Enter төймәләренә басыгыз

Фикерләр




Бик мөһим һәм кызыклы хәлнең шаһиты булдыгызмы? Редакциягә хәбәр итегез!

+7 927 037-91-10