ҺАВА ТОРЫШЫ -2 oC

Яңалыклар

барлык хәбәрләр Татарстан Россия

Дин

Гомер буе белем алып яшәргә кирәк - мөфти Казан ислам университетын тәмамлаучыларга

21 июнь 2018, 15:51 , Фото: dumrt.ru

Гомер буе белем алып яшәргә кирәк - мөфти Казан ислам университетын тәмамлаучыларга Барлыгы 67 яшь белгеч уку йортын тәмамлау турында диплом алган.

(Казан, 21 июнь, "Татар-информ"). Бүген Казан ислам университетында чыгырылыш кичәсе булып узды. Уку йортын тәмамлау турында быел 67 яшь белгеч диплом алды. Алар белән Татарстан мөфтие Камил хәзрәт Сәмигуллин да очрашты. Бу хакта Татарстан мөселманнары диния нәзарәтенең матбугат үзәге хәбәр итә.

67 яшь белгечнең 13енә кызыл диплом тапшырылды. Шунысы да игътибарга лаек: хатын-кызлар һәм ирләр төркемнәре кеше саны буенча бертигез диярлек. Үзенең тәбрикләү сүзендә мөфти хәзрәтләре белем алуның әһәмияте турында сөйләде һәм алган дипломнарда тукталып калмаска өндәде. "Алынган диплом - ул бары кеше укый башлаган дигән билге генә. Гомер буе белем алып яшәргә кирәк. Раббыбыз шушы юлда тырышлыкларыгызны кабул итсен һәм аны дәвам итәргә насыйп әйләсен", - диде мөфти.

Мөфтинең урынбасары, Болгар ислам академиясе һәм Россия ислам институты ректоры Рәфыйк хәзрәт Мөхәммәтшин үз чиратында белем йорты чыгарган белгечләрнең югары дәрәҗәдәге әзерлекләрен ассызыклап үтте. "Без дин әһелләрен генә түгел, татар мөселман зыялыларын әзерләү өстендә эшлибез. Һәм безнең вузны тәмамлап чыгучылар белемнәре һәм үз-үзләрен тотышлары белән дин кардәшләребезгә һәм башка дин вәкилләренә үрнәк булып тора, дәгъват күрсәтә", диде мөфти урынбасары.

Мәртәбәле кунаклар арасында шулай ук ТР Президенты Аппаратының эчке сәясәт Департаменты киңәшчесе Айнур Солтанов та бар иде. Ул дин белгечләренең бүгенге көндә дини оешмаларда гына түгел, башка чиктәш өлкәләрдә дә кирәклеге турында сөйләде.

Алга таба сүз тантананың сәбәпчеләре - Казан ислам университетын тәмамлаучыларга бирелде. Аларның барысы исеменнән 77 яшьлек Әмирҗан хәзрәт Якупов чыгыш ясады. Ул остазларга рәхмәт әйтте һәм курсташларын укуны дәвам итәргә чакырды.

  • Быел Казан ислам университетының көндезге бүлеген - 9, кичке бүлекне - 10, читтән торып уку бүлеген 48 кеше тәмамлады. Университет өчен бу - 7нче чыгарылыш. 

Безгә Telegramда язылыгыз

Әгәр хата күрсәгез, текстны билгеләгез һәм Ctrl + Enter төймәләренә басыгыз

Фикерләр




Бик мөһим һәм кызыклы хәлнең шаһиты булдыгызмы? Редакциягә хәбәр итегез!

+7 927 037-91-10