ҺАВА ТОРЫШЫ +21 oC

Яңалыклар

барлык хәбәрләр Татарстан Россия
МӨҺим
Иран футбол җанатарлары Казанда машина түбәсендәге палаткаларда яши
Питрәчнең Кощак авыл җирлеге чикләре үзгәртелү турында закон проекты кабул ителде
Россиядә Чемпионат вакытында 4 млн кеше һава юлы транспортын сайлаган
Казандагы яңа метро станцияләренең исемнәре билгеле булды
Казанда Чемпионатка багышлап 6 килолы пәрәмәч пешерәләр

Дин

Баулы ифтарына 400дән артык кеше җыелды

14 июнь 2018, 22:00 , Фото: bavly-tat.ru/

Баулы ифтарына 400дән артык кеше җыелды Ифтар мәҗлесе барышында Рәхмәт хатлары тапшырылды.

(Баулы, 14 июнь, "Татар-информ", "Хезмәткә дан", Индира Сайфуллина). Рамазан ае тәмамланырга бер көн кала Баулының “Өмет” мәчетендә чираттагы район ифтары үтте. Изге ашка йөзләрчә халык җыелды, дип яза җирле басма.

 

Мәчеткә халык килгәнче ифтар мәҗлесенә аш әзерләүчеләр белән аралаштык. Ел саен ифтар мәҗлесләре табынын әзерләүдә Тутыя абыстай Фәхретдинова зур тырышлык куя.

– Аллага мең шөкер, ике мәчетебездә дә Рамазан аенда ифтарлар оештырылып торды, – дип сүзен башлады ул, учак өстендәге зур казандагы ашны болгата-болгата. – Ачык һавада, учакта пешерелгән аш һәркем күңеленә хуш килә, кабат-кабат килеп рәхмәт әйтеп китәләр. Бүген без яшелчәле аш һәм пылау әзерләдек. Пылауга 20-25 килограмм рис, унҗиде килограмм сарык ите, 16 килограмм кишер, биш литр май һәм төрле тәмләткечләр, зира, кипкән барбарис салдык. Исе бик тәмле, тәме дә бик тәмле булырга ошап тора.

– Алланың рәхмәте, ярдәме белән, быел без ифтарлар үткәрергә иганәчеләр эзләмәдек, барысы да үзебезнең халык ярдәме белән оештырылды. Халык ифтар үткәрүнең савабын аңлап, теләп катнаша. Хәтта икешәр көн рәттән ифтар мәҗлесе үткәрүгә ярдәм итүче райондашларыбыз булды, – дип каршы алды безне районның имам-мөхтәсибе Әнвәр хәзрәт Хәмитов. – Район җитәкчеләре ярдәме белән шәһәребезнең ике мәчетенә дә ифтар вакытына автобуслар йөрүне оештырдык.

Ифтар вакыты җиткәч, мәчет бинасы халык белән шыгрым тулды. Мәчеткә килгән халык рәт-рәт булып намазга басты. Хөрмә җимеше һәм су белән авыз ачканнан соң, табынга утырыштылар. Район башлыгы Рамил Гатиятуллин районда яшәүче барлык мөселман халкын, килгән кунакларны якынлашып килүче гает бәйрәмнәре белән тәбрик итте. Тоткан уразаларның кабул булуын теләде. Аның изге теләкләре Баулы районына Төркиядән килгән коръән-хафиз Фатых Мөхәммәтнең коръән аятьләре укуы белән дәвам итте. Татарстан Диния нәзарәте чакыруы буенча әлеге илдән быел йөздән артык коръән-хафиз безнең республикага килгән.

Ифтар мәҗлесе барышында Кызылъяр авылыннан Мәгъдәнур хәзрәт Асылгәрәевка, Габделәхәт хәзрәт Җиһангәрәевка һәм Яңа Чүте авылыннан Миңнеһади хәзрәт Мөкатдисовка Рәхмәт хатлары тапшырылды.

 


Безгә Telegramда язылыгыз

Әгәр хата күрсәгез, текстны билгеләгез һәм Ctrl + Enter төймәләренә басыгыз

Фикерләр




Бик мөһим һәм кызыклы хәлнең шаһиты булдыгызмы? Редакциягә хәбәр итегез!

+7 927 037-91-10