ҺАВА ТОРЫШЫ +9 oC

Яңалыклар

барлык хәбәрләр Татарстан Россия

Җәмгыять

Татарстан Милли китапханәсе “Паркта китапханә” оештыра

18 май 2018, 14:44 , Фото: Султан Исхаков

Татарстан Милли китапханәсе “Паркта китапханә” оештыра Чара футбол буенча дөнья чемпионаты уңаеннан узачак.

(Казан, 18 май, “Татар-информ”, Ләйлә Хәкимова). Татарстанның Милли китапханәсе үзенчәлекле проект оештыра. 18 июньдә футбол буенча дөнья чемпионатына багышланган “Паркта китапханә” дигән мәдәни-агарту чарасы узачак. Бу хакта Татарстан Милли китапханәсенең фәнни эшләр буенча директор урынбасары Ирек Һадиев матбугат конференциясеннән “Татар-информ” хәбәрчесенә хәбәр итте.

“Башкалабызда узачак футбол буенча дөнья чемпионатында Милли китапханә дә читтә калмаячак. Китапка тагын да күбрәк игътибар тудыру, аның бүгенге ролен арттыру ниятеннән, “Паркта китапханә” проектын оештырырга уйладык. Бу чара халыкны китапханәләргә җәлеп итү максаты белән уздырыла.

Бәйрәмнең шигаре - “Казан - спорт һәм мәдәният башкаласы”.

Проект ярдәмендә туристларны, чемпионатка килгән кунакларны, башкалабыз спортчылары һәм аларның уңышлары белән таныштырачакбыз”, - диде Ирек Һадиев.

Ирек Һадиев хәбәр итүенчә, программада китап һәм иллюстратив тематик күргәзмә, буккроссинг, китап һәм иҗади остаханәләр, спорт уеннары оештырыла. “Ачык микрофон” рубрикасында спортчылар, төрле иҗат коллективлары, мәдәният һәм сәнгать эшлеклеләре белән очрашулар көтә.

Китапханәчеләр иҗатына багышланган күргәзмә-ярминкәдә истәлеккә яки бүләк итү өчен сувенирлар сатып алырга мөмкин булачак. Буккроссинг яратучылар өчен китаплар алмашу каралган. Ягъни, үзең алып килгән китапларны киштәдә калдырып, ошаган башка китапны алу мөмкинлеге тудырыла. Шулай ук катнашучылар өчен “Уку залы” эшләячәк, китапханәгә беренче тапкыр мөрәҗәгать итүчеләргә бердәм укучы билеты бирү дә каралган.

Чара Лобачевский һәйкәле янында, Кремлёвский, 33 йорт тирәсендә иртәнге үнбердән көндезге өчкә кадәр барачак.


Безгә Telegramда язылыгыз

Әгәр хата күрсәгез, текстны билгеләгез һәм Ctrl + Enter төймәләренә басыгыз

Фикерләр




Бик мөһим һәм кызыклы хәлнең шаһиты булдыгызмы? Редакциягә хәбәр итегез!

+7 927 037-91-10