ҺАВА ТОРЫШЫ +17 oC

Яңалыклар

барлык хәбәрләр Татарстан Россия

Җәмгыять

Татарстанда бу елдан бушлай журналист белеме алып булмаячак – Илшат Әминов

9 апрель 2018, 15:00 , Фото: Рамиль Гали

Татарстанда бу елдан бушлай журналист белеме алып булмаячак – Илшат Әминов Татар журналистларының бушлай укый алмавын зур проблема дип саный Әминов.

(Казан, 9 апрель, “Татар-информ”, Чулпан Шакирова). Татарстанда бу елдан башлап бушлай журналист белеме алып булмаячак. “Яңа Гасыр” телерадиокомпаниясе җитәкчесе Илшат Әминов татар журналистларының бюджетта бушлай укый алмавын зур проблема дип бәяли. Бу хакта ул бүген журналистларга ТНВ базасында узган матбугат очрашуында әйтте. Конференция ТНВның булачак абитуриентларга юнәлдерелгән максатчан грант оту конкурсына багышланган иде.

“Милли журналистларның бушлай белем ала алмавын мин трагедия ук булмаса да, зур проблема итеп кабул итәм. Бу - бик авыр фраза һәм мин аны әйтергә мәҗбүрмен. Бу - бик зур проблема. Әмма аны ниндидер юллар аша чишәргә була. Федераль үзәктән килә торган планнарны без боза алмыйбыз. Бюджет урыннары булмау – бу җирле хезмәткәрләр уйлап чыгарган уйдырма түгел, билгеле. Шуңа күрә журналистларны, “телевизионщиклар”ны максатчан укыту юлы белән әзерләргә кирәк”, – диде Әминов.

Телекомпания директоры татар журналистларын башка һөнәр ияләре алыштыра алмый дигән фикердә.

“Татар телевидениясе журналистикасының профессиональ нигезе булырга тиеш. Билгеле, белгечләрне башка өлкәдән математик, физикларны җәлеп итеп була диярсез. Алар да килә ала. Әмма журналистиканың умыртка баганасы – профессиональ белгечләр. Булачак журналистларны әзерләү өчен конкрет практика кирәк. Минем фикеремчә, укытуда 80 процент практика, 20 процент теория бирелергә тиеш. Бүген массакүләм коммуникацияләр журналистларын шулай әзерләргә кирәк”, – диде Илшат Әминов.

Исегезгә төшерәбез, “Яңа Гасыр” телерадиокомпаниясе татар журналистларын табу һәм үстерү ниятеннән #ӘЙДӘТНВГА# исеме астында махсус конкурс игълан итте. ТНВның махсус проектында катнашып, КФУда бушлай белем алырга, тв-журналист булырга мөмкин. “Яңа Гасыр” каналының максатчан грантына татар телен камил белгән 11нче сыйныф укучылары гариза тапшыра ала.
 


Безгә Telegramда язылыгыз

Әгәр хата күрсәгез, текстны билгеләгез һәм Ctrl + Enter төймәләренә басыгыз

Фикерләр




Бик мөһим һәм кызыклы хәлнең шаһиты булдыгызмы? Редакциягә хәбәр итегез!

+7 927 037-91-10