ҺАВА ТОРЫШЫ +20 oC

Яңалыклар

барлык хәбәрләр Татарстан Россия

Җәмгыять

Күкрәктә яман шешне ачыклау буенча Казанда узган акциянең якынча нәтиҗәләре билгеле

7 март 2018, 18:54 , Фото: Ильнар Тухбатов

Күкрәктә яман шешне ачыклау буенча Казанда узган акциянең якынча нәтиҗәләре билгеле Табиблар 546 хатын-кызның сөт бизләрен тикшерде.

(Казан, 7 март, “Татар-информ”, Гөлнар Гарифуллина). Күкрәктә яман шешне башлангыч стадиядә диагностикалау буенча, #япрошла социаль акциясенең нәтиҗәләре мәгълүм. Аларны "Татар-информ" хәбәрчесенә Республика клиник онкология диспансеры матбугат хезмәтеннән хәбәр иттеләр.

Казанда “Мега” сәүдә үзәгендә узган социаль акциядә табиблар барлыгы 546 хатын-кызның сөт бизләрен караган. 54 хатын-кызда зарарсыз шеш, 5 хатын-кызда яман шеш булуы турында шик туган. Былтыр акциядә 560 хатын-кызның тикшерү узганлыгы билгеле.

Социаль акциядә Татарстан Президенты ярдәмчесе Наталия Фишман да катнашты.

Белешмә өчен. Сөт бизләре рагы хатын-кызлардагы барлык онкологик авырулар арасында беренче урында.

2017 елда сөт бизләре яман шешенең 1725 яңа очрагы ачыкланган. Бу сан 2016 елга караганда 7,5 процентка күбрәк. 2016 елда 1604 яңа очрак өстәлгән булган. Былтыр бу яман чирдән 553 кеше дөнья куйган. 2016 ел белән чагыштырганда, 22 кешегә артык.

Бүген Республика клиник онкология диспансерында бу диагноз белән учетта 18 252 кеше тора, шуның 61,8 проценты, ягъни 11 296 кеше учетта 5 һәм аннан артыграк ел. Бу, 2016 елга караганда, 0,4 процентка күбрәк.

Республика халкының яман шешләрдән үлем структурасында үпкә рагы, колоректаль рак һәм ашказаны рагыннан соң, сөт бизләре рагы дүртенче урында (8,5 процент).

Авыруны I-II стадияләрендә ачыклау һәм ракны вакытында дәвалау 85-90 процент очракта тулысынча дәвалану мөмкинлеге бирә. Чирне башлангыч стадиядә ачыклау өчен, даими тикшеренеп тору һәм сәламәт тормыш рәвешен алып бару буенча белгечләр киңәшләрен истә тоту мөһим, дип искәртә белгечләр.

 

 


Безгә Telegramда язылыгыз

Әгәр хата күрсәгез, текстны билгеләгез һәм Ctrl + Enter төймәләренә басыгыз

Фикерләр




Бик мөһим һәм кызыклы хәлнең шаһиты булдыгызмы? Редакциягә хәбәр итегез!

+7 927 037-91-10