ҺАВА ТОРЫШЫ +15 oC

Яңалыклар

барлык хәбәрләр Татарстан Россия

Җәмгыять

Зәй районы хастаханәсендә капиталь төзекләндерүдән соң балалар корпусы ачыла

21 декабрь 2017, 16:48

22 декабрьдә булачак ачылыш тантанасында Татарстан сәламәтлек саклау министры Гадел Вафин катнашуы көтелә.

(Казан, 21 декабрь, “Татар-информ”). Зәй үзәк район хастаханәсендә капиталь төзекләндерүдән соң балалар корпусы ачыла. 22 декабрьдә булачак ачылыш тантанасында Татарстан сәламәтлек саклау министры Гадел Вафин катнашуы көтелә, дип хәбәр итә “Татмедиа” акционерлык җәмгыяте.

Зәй үзәк район хастаханәсе баш табибы Рим Әмиров беренче һәм икенче катларда поликлиника булачагын, өченче катта тугыз палатадан торган балалар стационары урнашачагын җиткерде. Балалар корпусы 2331,2 квадрат метр мәйданны алып торачак.

Капиталь төзекләндерү 2017 елның июнь аенда башланган. Төзүчеләр электр, су, җылылык, канализация һәм вентиляция белән кондиционерлаштыру системасын алыштырган. Заманча яңа җиһазлар сатып алынган. Балалар өчен велотренажер эшләячәк. Кечкенә пациентларны 14 табиб һәм 49 урта медицина персоналы дәвалаячак.

Зәй районы хастаханәсен капиталь төзекләндерүгә республика бюджетыннан 111 млн сумнан артык акча бүленгән.

Киләсе елга өлкәннәр өчен булган поликлиника, диагностика корпусы, хастаханә филиалы ремонтланачак.
 


Безгә Telegramда язылыгыз

Әгәр хата күрсәгез, текстны билгеләгез һәм Ctrl + Enter төймәләренә басыгыз

Фикерләр




Бик мөһим һәм кызыклы хәлнең шаһиты булдыгызмы? Редакциягә хәбәр итегез!

+7 927 037-91-10