ҺАВА ТОРЫШЫ +23 oC

Яңалыклар

барлык хәбәрләр Татарстан Россия
МӨҺим
23 июньнең төп вакыйгалары - фото һәм сылтамалар
Ык буе авыллары Сабан туе батыры билгеле булды
Р.Миңнеханов "хәләл" продукциянең җитештерү таләпләренә тәңгәллеген тикшерергә кушты
Казанда Каюм Насыйри турында китап тәкъдим ителде
Журналист Наил Алан туган авылында җирләнде

Фән һәм мәгариф

Татарстан табигате энциклопедиясе өчен галимнәр 5 үзенчәлекле карта төзегән

15 декабрь 2017, 16:11 , Фото: Илнар Төхбәтов

Татарстан табигате энциклопедиясе өчен галимнәр 5 үзенчәлекле карта төзегән Табигатькә багышланган яңа һәм беренче энциклопедиягә иллюстрацияләрне рәссамнар махсус ясаган.

(Казан, 15 декабрь, "Татар-информ", Лилия Гаделшина). “Татарстан Республикасы табигате һәм табигать ресурслары” энциклопедиясе иллюстрацияләргә бай. “Ул кирәкле мәгълүматны тиз генә табып уку һәм күзаллау өчен уңайлы итеп эшләнгән, материаллар берничә бүлектә һәм алфавит тәртибендә бирелгән, – дип белдерде яңа хезмәтнең редколлегия әгъзасы Лариса Айнетдинова. Татар энциклопедиясе һәм төбәкне өйрәнү институты тарафыннан төзелгән фәнни басманы бүген Казанда ТР Фәннәр академиясендә киң җәмәгатьчелеккә тәкъдим иттеләр.

Татарстан табигатенә багышланган энциклопедиядә 1975 мәкалә урын алган. Алар 7 төп бүлеккә тупланган – геология һәм җир асты байлыклары (178 мәкалә), физик-географик районнар, ландшафтлар, табигать комплекслары (136 мәкалә), елга, күлләр һәм сусаклагычлар (530 мәкалә), хайваннар дөньясы, фауна (518 мәкалә), үсемлек дөньясы, флора (512 мәкалә), экология, табигатьтән файдалану, табигатьне саклау (61 мәкалә).

Мәкаләләрнең күпчелеге фотосурәтләр һәм рәсемнәр белән тулыландырылган. Үсемлек һәм хайваннар дөньясын тасвирлаучы рәсемнәрнең бер өлешен рәссам Виталий Булатов махсус ясаган.

Тарих фәннәре кандидаты Лариса Айнетдинова сөйләгәнчә, энциклопедиядә барлыгы 928 иллюстрация, шул исәптән, институт галимнәре төзегән үзенчәлекле 5 карта (геологик, туфрак, физик, атмосфера явым-төшемнәре), 22 таблица, 10 схема китерелә. “Бу – Татарстан табигате үзенчәлекләре турында сөйләүче беренче энциклопедия. Ул табигатебезнең бүгенге хәле, аны сакламасак нәрсә югалтачагыбызны аңларга ярдәм итә”, – дип ассызыклады Институтның Төбәкне өйрәнү һәм социаль-мәдәни тикшеренүләр бүлеге мөдире.

Мәгълүм булганча, энциклопедияне төзүдә КФУ, Руда булмаган файдалы казылмалар геологиясе үзәк фәнни-тикшеренү институты, Идел-Кама биосфера тыюлыгы, ТФА Экология һәм җир асты байлыкларыннан файдалану проблемалары институты һәм башкалар катнашкан. Авторлык коллективы 87 галимне берләштерә. Җаваплы мөхәррире – институтның өлкән фәнни хезмәткәре, авыл хуҗалыгы фәннәре кандидаты Фәрит Борһанов.


Безгә Telegramда язылыгыз

Әгәр хата күрсәгез, текстны билгеләгез һәм Ctrl + Enter төймәләренә басыгыз

Фикерләр




Бик мөһим һәм кызыклы хәлнең шаһиты булдыгызмы? Редакциягә хәбәр итегез!

+7 927 037-91-10