ҺАВА ТОРЫШЫ +21 oC

Яңалыклар

барлык хәбәрләр Татарстан Россия
МӨҺим
Зәйдәге торак йортта газ шартлауның башлангыч сәбәбе билгеле булды
Рөстәм Миңнехановка Зәйдәге гадәттән тыш хәл турында соңгы мәгълүматлар хәбәр итеп торыла
Зәйдә газ шартлаган йорттан кешеләрне күчерделәр
22 июньнең төп вакыйгалары - фото һәм сылтамалар
Әтнә авыл хуҗалыгы техникумы быел 47 механик әзерләп чыгара

Татар дөньясы

Шагыйрә Илсөяр Иксанова: Бала телле булып тумый, аны әти-әнисе телле итә

10 ноябрь 2017, 16:03

Шагыйрә бүген Арча көллиятендә студентларга үткәргән дәрестә балалары, оныклары белән татарча сөйләшмәгән ата-аналарны тәнкыйтьләде.

(Арча, 10 ноябрь, "Татар-информ", Чулпан Шакирова). Бүген бер төркем татар шагыйрьләре һәм Татарстанның халык артисты Миңгол Галиев Казан артының милли кадрлар әзерләү үзәге - Арча педагогия көллиятендә дәрес бирде. "Укытучылар" әлеге дәрескә җитди әзерләнгән, аларга 45 минут вакыт җитмәде.

"Түгәрәк уен" журналы мөхәррире, шагыйрә Илсөяр Иксановага физкультура укытучылары әзерләнүче төркем алдында чыгыш ясарга туры килде. Ул үзенең курсташы Фәридә Гайфуллинаны алыштырды. Дәреснең кереш өлешендә ул, үзенең мәктәп елларына кайтып, физкультурага артык әһәмият бирмәвен, әмма чиреккә "2"ле чыкканнан соң, әлеге фәнгә җитди каравын искә төшереп сөйләде. "Сез нинди сынаулар аша узып, студент булуыгызны белдек", - дип тә әйтте ул. Искәртеп узыйк, көллият директоры Гөлнара Гарипова "иң зур конкурс физкультура укытучылары әзерли торган бүлеккә", дигән иде.

Илсөяр Иксанова "Әдәбият - тел, милләт сакчысы" темасына багышланган дәрестә, укучыларга тормыштан алынган мисаллар китерде. "Күптән түгел театрга бардым. 25-30 яшьләр тирәсендәге бер ханым әнисе белән сөйләшеп тора. Яннарында 3-4 яшьлек кечкенә генә кызчык. "Бар әле, комачаулама",- ди әнисе аңа русча. Аптырап киттем. "Сезнең балагыз татарча белми мени?" - дидем. "Юк", - диләр. Ничек инде? Бала бит тел белеп тумый, телгә булган мәхәббәт аның геннарына салына, ә баланы әти-әнисе телле итә", - дип белдерде шагыйрә.

Илсөяр Иксанова дәрес вакытында балалар, оныклар белән русча сөйләшү мисалларын китерде. Шулай ук укытучыларга мөрәҗәгать итеп: "Татар телен гаиләдә дә, җәмгыятьтә дә саклау бурычы турыдан-туры, сезгә, булачак укытучыларга йөкләнә",- дип билгеләп үтте.

Искәртеп үтик, бүген Казан арты милли кадрлар әзерләү үзәге - Арча педагогия училищесында "Шагыйрь дәрес бирә" республикакүләм белем бирү проекты бара. Быел ул өченче тапкыр оештырылды.


Безгә Telegramда язылыгыз

Әгәр хата күрсәгез, текстны билгеләгез һәм Ctrl + Enter төймәләренә басыгыз

Фикерләр




Бик мөһим һәм кызыклы хәлнең шаһиты булдыгызмы? Редакциягә хәбәр итегез!

+7 927 037-91-10