ҺАВА ТОРЫШЫ -15 oC

Яңалыклар

барлык хәбәрләр Татарстан Россия

Авыл

Татарстанның ветеринар табибы AgroSkills чемпионатында икенче урын алды

2 ноябрь 2017, 12:32

“AgroSkills” – авыл хуҗалыгы тармагында “WorldSkills” дөнья стандартлары буенча үткәрелүче чемпионат.
(Казан, 2 ноябрь, “Татар-информ”). 30 октябрь-1 ноябрь көннәрендә Ставропольдә “AgroSkills” һөнәри осталык чемпионаты узды. “Ветеринария” белгечлеге буенча оештырылган әлеге ярышларда катнашкан Татарстан вәкиле мактаулы икенче урынга лаек булды, дип хәбәр итә Татарстан Республикасы Министрлар Кабинеты Баш ветеринария идарәсе матбугат хезмәте.
 
“AgroSkills” – авыл хуҗалыгы тармагында “WorldSkills” дөнья стандартлары буенча үткәрелә торган чемпионат. Анда 18-28 яшьлек белгечләр көч сынаша. Быел ул сентябрьдән ноябрьгә кадәр Россиянең төрле аграр университетларында “Агрономия”, “Ветеринария”, “Авыл хуҗалыгы машиналарын эксплуатацияләү”, “Үсемлекчелек” кебек юнәлешләрдә уза. Чемпионат “WorldSkills Russia” хәрәкәте һәм Россиянең Авыл хуҗалыгы министрлыгы тарафыннан оештырыла.
 
Ставрополь дәүләт аграр университетындагы ярышка тугыз төбәктән – Татарстан, Удмуртия Республикаларыннан, Мәскәү, Түбән Новгород, Тамбов, Калининград, Сарытау өлкәләреннән, Ставрополь краеннан авыл хуҗалыгы предприятиеләрендә эшләүче яшь белгечләр җыелган иде. Сынау буларак, аларга терлеккә медицина тикшерүен үткәрү, микробиологик анализлар ясау, хирургия белемен күрсәтү таләп ителде.
 
Яшь белгечләрнең һөнәри осталыгын, белем сыйфатын 30дан артык эксперт бәяләде. Татарстанның Биектау районында урнашкан Бөреле җәнлек совхозы ветеринар табибы Ренат Пирогов чемпионаттан икенче урын алып кайтты.
 

Безгә Telegramда язылыгыз

Әгәр хата күрсәгез, текстны билгеләгез һәм Ctrl + Enter төймәләренә басыгыз

Фикерләр




Бик мөһим һәм кызыклы хәлнең шаһиты булдыгызмы? Редакциягә хәбәр итегез!

+7 927 037-91-10