ҺАВА ТОРЫШЫ +24 oC

Яңалыклар

барлык хәбәрләр Татарстан Россия
МӨҺим
КФУ эксперты: Казанда яхшы һава торышы пәнҗешәмбегә кадәр сакланачак
Алексеевск районында җиңел автомобиль юл читенә очкан һәм әйләнеп капланган
Балыкчылар Лаеш районында елгада баткан чит ил автомобилен видеога төшергән
Россиядә чит илдән интернет аша әйбер сатып алган өчен пошлина кертергә мөмкиннәр
Чаллыда "Сабан туе гүзәле" җиңүчесенә нинди бүләк тапшырылачагы мәгълүм булды

Фән һәм мәгариф

Яшел Үзән мәктәбендә татар мохитенә гашыйк Анастасия укый

24 октябрь 2017, 07:00

II сыйныфта рәхәтләнеп татарча сөйләшә башлаган.

(Яшел Үзән, 24 октябрь, «Татар-информ», «Яшел Үзән», Алия Гаязова). Бер авыз сүз татарча белмәгән Бишбатман авылы кызы Анастасия Пустынникова моннан тугыз ел элек Олы Ачасыр мәктәбенең I сыйныфына аяк баса. Күз алдына китереп карагыз әле, чеп-чи татар авылы һәм мәктәбе бит бу. Бер сүз аңламаган килеш ничек итеп укырга кирәк, дип яза җирле басма.

Ә ул укый, чөнки беренче укытучысы Гөлназ Шиһабетдинова һәм сыйныфташлары бу сөйкемле кызны бер күрүдә ошатып, үз итә. Алай гына да түгел, Настяны бар көчләрен җыеп, бөтен мәктәп белән татар теленә өйрәтергә керешәләр. Һәрнәрсәне аңлатып, тәрҗемә итеп, аңарда туган телләренә мәхәббәт уяталар. Шуның кадәр яхшы итеп өйрәнә ки, хәтта өенә кайткач әти-әнисе белән дә онытылып сөйләшеп китә, алар аңламагач кына рус теленә күчә. Әти-әнисе кызларын башка мәктәпкә бирикме икән диеп тә уйлана башлый. Әмма чын күңеле белән шушы коллективка гашыйк кыз башка җиргә күченергә аяк терәп каршы килә.

– Оялып кына шушы мәктәпкә аяк басуым бүгенгедәй хәтердә. II сыйныфта инде мин рәхәтләнеп татарча сөйләшә идем. Беренче укытучым Гөлназ апага, сыйныфташларыма рәхмәтлемен. Гомумән барлык мөгаллимнәргә дә хөрмәтем зур, – ди Настя.

Бүген IX сыйныфта 4 кыз, 2 малай укый. Алар бердәмлеге, дус булуы белән аерылып тора. Бу балаларны V класстан үз кочагына алган Рәмил Шакиров өчен һәммәсе үзенчә якын.

–Безнең Настя чын татар кызы инде ул. «4»-«5» билгеләренә генә укый, тырышлыгы белән аерылып тора. Иң мөһиме – тәртипле һәм тыйнак. Мәктәп чараларында да актив катнаша, кечкенәдән бии, җырлый. Үзе шигырьләр дә иҗат итә. Татар теле һәм әдәбияты фәне буенча узган муниципаль конкурсларда да актив катнаша, – дип сөйли сыйныф җитәкчесе.

Бер генә рус сүзен дә кыстырмыйча, нәкъ Ачасырларча матур һәм йомшак итеп сөйләшүче кызга сокланмый мөмкин түгел. Аның өчен татар теле, үз туган теле кебек якын, кадерле. Һәм татар гаиләсендә тәрбияләнеп тә, рус телендә сөйләшергә яраткан яшьтәшләрен ул бөтенләй аңламый. Без исә киләчәктә шәфкать туташы булырга хыялланган Анастасиягә уңышлар теләп калабыз.


Безгә Telegramда язылыгыз

Әгәр хата күрсәгез, текстны билгеләгез һәм Ctrl + Enter төймәләренә басыгыз

Фикерләр




Бик мөһим һәм кызыклы хәлнең шаһиты булдыгызмы? Редакциягә хәбәр итегез!

+7 927 037-91-10