ҺАВА ТОРЫШЫ -11 oC

Яңалыклар

барлык хәбәрләр Татарстан Россия
×

Сәясәт

Аксубайда тарихи һәм сәяси яктан мөһим вакыйга булды

6 июнь 2017, 07:00

Аксубайда тарихи һәм сәяси яктан мөһим вакыйга булды Социаль-икътисади һәм мәдәни үсеш мәсьәләләре буенча килешүгә районның депутатлар корпусы, оешмалар һәм ведомстволар җитәкчеләре катнашында кул куелды

(Аксубай, 6 июнь, "Татар-информ", "Авыл таңнары"). РФ Дәүләт Думасында “Бердәм Россия“ фракциясе депутаты Айрат Хәйруллин, Татарстан Республикасы Дәүләт Советы депутаты Шамил Яһудин һәм Аксубай муниципаль районын тәкъдим итүче Илшат Заһидуллинның үзара хезмәттәшлеге турында өч яклы үзара килешү имзаланды, дип яза җирле басма.

Социаль-икътисади һәм мәдәни үсеш мәсьәләләре буенча килешүгә районның депутатлар корпусы, оешмалар һәм ведомстволар җитәкчеләре катнашында кул куелды.

– Бүген – зур билгеләнешкә ия көн, – дип ассызыклады Дәүләт Думасы депутаты Айрат Хәйруллин. – Федерациянең бер генә субъектында да мондый вакыйганың булганы юк әле. Татарстанда исә барлык дәрәҗәдәге депутатларның координацион эше күптәннән, якынча 8 ел элек җайга салынды. Үзем килә алмаганда, ярдәмчеләрем гражданнарны кабул итә. Без бөтен проблемалар турында да белеп торабыз. Монда булган депутатларны да үзләренең сайлаучыларына якынрак булырга чакырам. Безнең бурыч – барлык проблемалары һәм сораулары белән бөтен сайлаучыларны да кабул итү. Үз дәрәҗәгездә хәл итәрлек мәсьәләләр булса, һичшиксез, чишегез. Мөмкин түгел икән, район башлыгына мөрәҗәгать итегез. Район җитәкчелеге дә чишә алмаганда (район бюджетында каралмаган, вәкаләтләр белән тәэмин ителмәгән), Дәүләт Советы депутаты буларак Шамил Габделхәй улы һәм Дәүләт Думасы депутаты буларак, мин проблемалы мәсьәләләр өстендә эшләячәкбез.

– Соңгы елларда республикада күп эшләр башкарыла, безнең районда да социаль программалар эшләп килә, – дип билгеләп үтте район башлыгы Камил Гилманов. – “Бердәм Россия“ партиясе ярдәме белән бик күп планнарны тормышка ашыра алдык. Өч яклы килешү үзара мөнәсәбәтләрне тагын да ныгытыр һәм без тагын да тыгызрак эшли башларбыз.

Ул шулай ук республикада беренчеләрдән булып кыр эшләренә керешүебез һәм беренчеләрдән булып тәмамлавыбыз турында да бәян итте. Малларның баш исәбен саклап калуга, сөт җитештерүне арттыруга да ирештек, диелгән район хәбәрендә.


 


Безгә Telegramда язылыгыз

Әгәр хата күрсәгез, текстны билгеләгез һәм Ctrl + Enter төймәләренә басыгыз

Фикерләр




Бик мөһим һәм кызыклы хәлнең шаһиты булдыгызмы? Редакциягә хәбәр итегез!

+7 927 037-91-10