ҺАВА ТОРЫШЫ +5 oC

Яңалыклар

барлык хәбәрләр Татарстан Россия

Дин

Минтимер Шәймиев: "Соңгы елларда Болгарда эшләнгән эшләр - могҗиза"

20 май 2017, 12:33 , Фото: Салават Камалетдинов

Минтимер Шәймиев: "Болгар академиясен сентябрьдә ачарбыз, дип хыялланабыз гына түгел, эшне башларбыз, дип ышанабыз", - дип белдерде Дәүләт Киңәшчесе.

(Болгар, 20 май, "Татар-информ", Гөлнар Гарифуллина). "Соңгы елларда Болгарда башкарылган эшләр күңелебезгә хуш килә. Бу эшләр могҗиза бит. Чын тормышта могҗиза күрәбез", - дип белдерде Татарстанның Дәүләт Киңәшчесе Минтимер Шәймиев Изге Болгар җыены тантаналы чарасында.

"Хөрмәтле ватандашлар, мөселман кардәшләребез, кунакларыбыз! Чын тормышта могҗиза күрәбез. Халкыбызның рухи көче турында сүз бара. Бабаларыбыз ислам динен кабул иткән биредә. Россия Президенты Владимир Путин, Татарстан Президенты Рөстәм Миңнеханов ярдәме белән хәзер монда изге эшләр башкарыла. 7 ел эчендә күпме эшләр эшләнде. Болгар академиясен булдыру дөрес фикер булды. Узган елда беренче ташка нигез салган идек. Быел сентябрьдә ачарбыз, дип хыялланабыз гына түгел, эшне башларбыз, дип ышанабыз. Иң мөһиме - шартлар тудырылган", - дип билгеләп узды Минтимер Шәймиев.

Дәүләт Киңәшчесе бүген Татарстан Президенты Рөстәм Миңнехановның "Без шушылай яшәргә тиеш" дигән сүзләренең күңелгә ятышлы булуын билгеләп узды. Минтимер Шәймиев камил ислам белеме бирү системасы булмавын, ислам дөньясында дөрес юнәлеш кирәклеген, Болгар ислам академиясенең шул максаттан төзелүен әйтте.

"Болгар ислам академиясе башка урында була алмавына тагын бер кат инандык. Без булдырабыз!" - дип белдерде Минтимер Шәймиев һәм сәламәтлек, иминлек теләде.

 

 


Безгә Telegramда язылыгыз

Әгәр хата күрсәгез, текстны билгеләгез һәм Ctrl + Enter төймәләренә басыгыз

Фикерләр




Бик мөһим һәм кызыклы хәлнең шаһиты булдыгызмы? Редакциягә хәбәр итегез!

+7 927 037-91-10