ҺАВА ТОРЫШЫ -8 oC

Яңалыклар

барлык хәбәрләр Татарстан Россия

Спорт

Яшел Үзән көрәшчеләре Данил Галиев истәлегенә республикакүләм турнирда уңышлы чыгыш ясады

7 апрель 2017, 00:00

Яшел Үзән көрәшчеләре Данил Галиев истәлегенә республикакүләм турнирда уңышлы чыгыш ясады Түбән Каманың бик зур һәм иркен "Шинник" спорт корылмасында өч келәмдә 300 көрәшче бил алышкан.

(Яшел Үзән, 7 апрель, «Татар-информ», «Яшел Үзән», Әлфия Зыякаева). Түбән Камада көрәш буенча атказанган спорт остасы Данил Галиев истәлегенә республика күләмендәге көрәш турниры быел егерме дүртенче тапкыр уздырылып, анда Яшел Үзән районыннан да көрәшчеләр катнашты, дип яза район басмасы..

Түбән Каманың бик зур һәм иркен "Шинник" спорт корылмасында өч келәмдә 300 көрәшче бил алышкан. Гадәттә, бу ярышка республиканың иң көчле көрәшчеләре җыела. Быел аңа Башкортстан һәм Оренбургтан да көрәш осталары килгән.

Данил Галиев – көрәш дөньясы өчен билгеле шәхес. Үз чорының бил бирмәс батыры Татарстанның – 12, Россиянең – 8, Муса Җәлил истәлегендәге бәйгенең 6 тапкыр җиңүчесе булып танылган. Шуңа күрә бу ярыш ел саен зур дәрәҗәдә узып, республиканың мәртәбәле ярышларының берсе булып кала. Бу турнирда җиңүчеләр зур дәрәҗә алып, күбесенә тагын да югарыракларына юл ачыла.

Көрәштә катнашкан якташыбыз, соңгы елларда Яшел Үзәннең иң көчле батыры, көрәш остасы, күп санлы республика һәм Россия күләмендәге ярышлар җиңүчесе Фирдүс Зәйнуллин 130 килограмм авырлык үлчәменнән авыррак булган категориядәге спортчылар арасында мәртәбәле II урынны алды.

Батырлар исемлегендә 60 килограмм үлчәмдәге көрәшчеләр арасында I урын алган карагуҗалы Илмир Камалиев та бар. Белгәнебезчә, бу егет хәзер Казанның Яңа Савин районы өчен көрәшә. Ул да бит кечкенәдән үк Яшел Үзән көрәш мәктәбендә тәрбияләнде.

Бу юлы Яшел Үзән командасыннан биш кеше катнашып, алар арасында 65 килограмм авырлыктагы көрәшчеләр арасында IV урын алган Эдуард Менделуц та бар. Яшел Үзән командасы призлы урын алмаса да, шәхси ярышларда җиңүчеләр булу куандыра.

Яшел Үзән көрәшчеләренә бу ярышларга барырга шәхси эшмәкәр Рафаэль Гадбрахманов ярдәм күрсәткән. Алар аңа бик рәхмәтле булып калалар. Ярышларга бару-кайту һәм катнашу, белгәнебезчә, зур чыгымнар таләп итә. Шундый булышчылар булу катнашучыларга да көч биреп тора, Яшел Үзән данын да күтәрә, диелә район хәбәрендә.


Безгә Telegramда язылыгыз

Әгәр хата күрсәгез, текстны билгеләгез һәм Ctrl + Enter төймәләренә басыгыз

Фикерләр




Бик мөһим һәм кызыклы хәлнең шаһиты булдыгызмы? Редакциягә хәбәр итегез!

+7 927 037-91-10