ҺАВА ТОРЫШЫ +22 oC

Яңалыклар

барлык хәбәрләр Татарстан Россия

Мәдәният

Әлкидә Халыкара театр көнендә авыл клублары үзешчәннәре сәхнә осталыкларын күрсәтте

2 апрель 2017, 07:00

Әлкидә Халыкара театр көнендә авыл клублары үзешчәннәре сәхнә осталыкларын күрсәтте “Театр яктылыкка, нурга илтә” – Халыкара театр көненә багышлап район мәдәният йортында үткәрелгән кичә әнә шулай аталды.

(Әлки, 2 апрель, "Татар-информ", "Әлки хәбәрләре",  Ләйлә Әхмәтшина). Әлки районында Халыкара театр көнендә авыл клублары үзешчәннәре сәхнә осталыкларын күрсәтте. “Театр яктылыкка, нурга илтә” – Халыкара театр көненә багышлап район мәдәният йортында үткәрелгән кичә әнә шулай аталды. Авыл клублары каршында оешып, әйбәт кенә эшләп килгән дүрт коллектив һәм район мәдәният йортының “Ташкыннар” халык театры тамашачы хозурына үз эшләрен тәкъдим итте, дип яза "Әлки хәбәрләре" газетасы.

Район мәдәният йортында оешкан коллектив “Өч балдызга бер ялгыз” спектаклен сәхнәләштергән, аның белән республика конкурсында катнашырга әзерләнә икән. Спектакльне Гөллия Яруллина куйган, төп рольләрнең берсен дә үзе башкара. Беренче карашка гади, җиңел эчтәлекле тоелган әсәр бүгенге авылларның төп проблемасын – халык кимүне кузгата. Ирләре кайсы кая китеп барган өч хатын-кызның, ничек кенә шаярсалар, шул арада җырлап алсалар да, күңелләре боек. Әсәрнең менә шушы рухын төп рольләрне башкаручы Эльмира Шиһапова, Эльвира Зыятдинова, Ленар Гыймаев, Илфат Кыямов бик оста итеп җиткерә белделәр тамашачыга. Шунысын да әйтим, егетләр-кызлар бу спектакльне Түбән Камада үтәчәк конкурска әзерлиләр. 

Үргәгар үзешчәннәре дә шаян эчтәлекле күренеш белән килгәннәр, алар ярты гасырдан артык бергә яшәгән әби-бабайның картлык көннәрендә аерылышырга җыенуларын җылы юмор белән күрсәттеләр. Бабай ролен оста итеп Илназ Кыямов башкарды. Әхмәт авылында эшләп килүче халык театры да заманча яңгырашлы, күп күренешле спектакль әзерләгәннәр. Хастаханәгә бәби алырга дип киткән, әмма аны югалткан, шушы хәсрәттән айнып та бетмәгән көе табиб сүзен тыңлап аналары баш тарткан ике сабыйны алырга ризалашкан һә ирен балаларыбыз игезәк булды бит дип алдаган хатын-кызның эчке кичерешләрен Миләүшә Шәмсиева гаять ышанырлык итеп башкарды.

Демидовка авылы үзешчәннәре һәрвакыттагыча сөендерде, шаккатырды. Бу коллектив рус халкының элеккеге гореф-гадәтләрен өйрәнеп, сәхнә аша бүгенге тамашачыга җиткерү, яшьләргә тапшыру өчен зур тырышлык куя. Алар рус туеның бер өлешен (зур спектакльдән өзек) күрсәттеләр. Режиссерлары Надежда Турова тырышлыгы белән әзерләнгән спектакль халыкча сөйләмле, киң күңеллелеге, борынгы җырлары, хәтта реквизитлары белән дә тамашачыны моннан күп еллар элек булган заманга кайгырды да куйды.

Югарыәлкилеләр дә нәкъ шулай иттеләр, тик алар элеккеге татар тормышын күрсәттеләр: театр бәйрәменә үзешчәннәр “Зәңгәр шәл”дән өзек әзерләгәннәр. Ишан хәзрәтнең дүрт хатынының ашка барырга җыенуын җанлы итеп сурәтләде алар.

Театр коллективлары эшләрен карап, жюри аларга бәя дә бирде. Билгеле, иң оста уйнаучылар – “Ташкыннар” халык театры булды. Тик бу кичәдә урыннар билгеләп тормадылар, барысының да тырышлыгын Мактау кәгазьләре, бүләкләр белән билгеләп үттеләр. Рольләрне иң оста итеп башкарган Миләүшә Шәмсиева, Гөлгенә Мисалова, Ленар Гыймаев, Алексей Балялин, режиссерлары булган Гөлия Яруллина белән Надежда Турова аерым бүләккә лаек булдылар.

Театр сәнгате гаять тирән һәм күпкырлы. Кечкенә генә әсәрне сәхнәләштереп, тамашачыга җиткерү өчен дә зур тырышлык һәм осталык кирәк. Шуңа да үзешчәннәребезнең спектакльләр куюы, сәхнә күренешләре әзерләве аерым мактауга лаек, диелә район хәбәрендә.


Безгә Telegramда язылыгыз

Әгәр хата күрсәгез, текстны билгеләгез һәм Ctrl + Enter төймәләренә басыгыз

Фикерләр




Бик мөһим һәм кызыклы хәлнең шаһиты булдыгызмы? Редакциягә хәбәр итегез!

+7 927 037-91-10