ҺАВА ТОРЫШЫ -13 oC

Яңалыклар

барлык хәбәрләр Татарстан Россия

Спорт

Кызганыч, азактан гол керттердек. Ялгышлар өстендә эшләрбез – Зиннәтулла Билалетдинов

13 март 2017, 23:39

"Ак Барс" хоккей командасы баш тренеры матчка үз бәясен бирде.

(Казан, 13 март, "Татар-информ"). Казанның "Ак Барс" хоккей командасы баш тренеры Зиннәтулла Билалетдинов "Авангард"ка каршы өченче уенга бәя бирде. Бүген Казан хоккейчылары Континенталь хоккей лигасы Көнчыгыш конференциянең 1/2 финал раундында беренче тапкыр җиңелү ачысы татыды – үз бозында Омскиның "Авангард" командасына оттырды (3:4 ОТ).

"Яхшы уен булды. Командалар нәтиҗә өчен уйный. Бүген безнең барып чыкмады, киләсе уенга әзерләнәбез", – диде матбугат конференциясендә Зиннәтулла Билалетдинов.

Әлеге уенда "Ак Барс" командасыннан ике алканы Андрей Попов звеносы кертте. Тренер аларга да бәя бирде. "Аларның ике алка кертүе – яхшы. Шулай дәвам итүләренә ышанабыз", – диде Билалетдинов.

Баш тренердан уен азагында гына Рафаэль Батыршинның кагыйдә бозуы, шуның аркасында кунакларның исәпне тигезләве хакында да сорамыйча калынмады.

"Хөкемдар штраф эскәмиясенә озаткан икән, димәк кагыйдә бозылган. Бу уен. Кызганыч, азактан гол керттердек. Ялгышлар өстендә эшләрбез", – диде "Ак Барс"ның баш тренеры. 


Безгә Telegramда язылыгыз

Әгәр хата күрсәгез, текстны билгеләгез һәм Ctrl + Enter төймәләренә басыгыз

Фикерләр




Бик мөһим һәм кызыклы хәлнең шаһиты булдыгызмы? Редакциягә хәбәр итегез!

+7 927 037-91-10