ҺАВА ТОРЫШЫ +5 oC

Яңалыклар

барлык хәбәрләр Татарстан Россия

Җәмгыять

Әтнә районы Комыргуҗа авылында кышны озаттылар

25 февраль 2017, 23:00

Әтнә районы Комыргуҗа авылында кышны озаттылар Әлеге җирлеккә кергән Мәрҗән, Төрекләр, Комыргуҗа авылларыннан килгән халык рәхәтләнеп күңел ачты.

(Әтнә, 25 февраль, Татар-информ, “Әтнә таңы”, Сурия Мингатина). Әтнә районы Комыргуҗа авылында кышны озаттылар. Әлеге җирлеккә кергән Мәрҗән, Төрекләр, Комыргуҗа авылларыннан килгән халык рәхәтләнеп күңел ачты дип яза районның “Әтнә таңы” газетасы.

Бу бәйрәмне ничек теләсәң, шулай атап була. Авыл җирлеге башлыгы Әнәс Хәкимов әйткәнчә, "Авыл бәйрәме, дисәк тә була. Кышкы сабантуй ук була алмас, быел икенче тапкыр оештырабыз. Тора-бара зурлап ук үткәрә башларбыз...", - диде ул Комыргуҗа мәктәбе каршында үткән әлеге чараны башлап җибәргәндә.

Казаннарда пылау пешә, кайнар коймак, чәй күпме телисең... Җырчылар җырлап, музыка уйнап тора. Алып баручысы район мәдәният бүлеге белгече, халык яратып өлгергән, үз иткән Әлфинә Мөхәмәтҗанова, мәдәният бүлеге мөдире Азат Хәйретдинов та шунда. Ә авыл җирлегендә нинди җитәкче бар, барысы халык арасында мәш килә. Олысы да, кечесе дә, таякка таянганы да, бала-чагасы да шунда...- авылда бәйрәм икәне, авыл башыннан ук сизелә. Спорт уеннарының ниндиен генә уйнамадылар...

Ә Комыргуҗада рәхәтләнеп ял иттеләр, алдынгыларга рәхмәт әйттеләр. Бүләкләр әзерләгәннәр, катнашучылар да, җиңгән командалар да буш кул китмәделәр. "Шахтер" хуҗалыгының бүләге монысы. Эшли белгән халык ял итә белергә тиеш. Кырыйдан кемдер катнашканны көтеп торсаң, бәлки бу кадәр үк булмас та иде. Ә Комыргуҗа җирлегендә яшәүчеләр үзләренә бәйрәм ясадылар, җырладылар, уйнадылар, ярыштылар, соңыннан җиңүче командаларны билгеләп, бүләк өләштеләр. Комыргуҗа командасына җитүчеләр булмады, алар - беренче. "Шахтер" командасы - икенче, Мәрҗән командасы - өчтә, Төрекләр - дүрттә, мәктәп командасы - биштә. Авыл җирлеге башлыгы Әнәс Хәкимов җиңүче командаларга акчалата бүләк өләште, дип язалар басма матбугатта.

 


Безгә Telegramда язылыгыз

Әгәр хата күрсәгез, текстны билгеләгез һәм Ctrl + Enter төймәләренә басыгыз

Фикерләр




Бик мөһим һәм кызыклы хәлнең шаһиты булдыгызмы? Редакциягә хәбәр итегез!

+7 927 037-91-10