ҺАВА ТОРЫШЫ +9 oC

Яңалыклар

барлык хәбәрләр Татарстан Россия
×

Спорт

Әлкидә Әсхәт Гәрәй улы истәлегенә мини-футбол ярышлары үткәрделәр

23 февраль 2017, 12:00

Әлкидә Әсхәт Гәрәй улы истәлегенә мини-футбол ярышлары үткәрделәр Дамир Шәйхетдинов ярышларда катнашкан барлык командаларга ихлас рәхмәтләрен җиткерде, дипломнар, акчалата призлар тапшырды.

(Әлки, 23 февраль, "Татар-информ", "Әлки хәбәрләре", Азат Низамиев). Әлки районы эшмәкәрләре Дамир һәм Альберт Шәйхетдиновлар әтиләре Әсхәт Гәрәй улы истәлегенә мини-футбол ярышлары үткәрделәр, дип яза район газетасы.

Анда җиде команда катнашты. Күрше Алексеевскидагы юл төзү предприятиесеннән дә көчле футболчылар килгән иде.

Беренче булып футбол кырына Базарлы Матактан “Бодрячки” футболчылары һәм Түбән Әлки авылы җыелма командасы чакырылды. “Бодрячки” – район үзәгендә тренер Рифкать Сәгъдиев җитәкчелегендә төрле елларда күнегүләр алган егетләр командасы. Хәер, остазлары Рифкать Сәгъдиев әледән-әле мәйданга чыгып үзе дә уйнады.

Очрашулар ике таймда 10 ар минут дәвам итә. Мини-футбол ул бик динамикалы уен. Биредә туп, хоккейдагы алка кебек, гел хәрәкәттә – артыннан күз иярми.

Беренче тайм 0:0 исәбе белән төгәлләнде. Әмма “Бодрячки” командасы бик оста уйный, әллә ничә тапкыр көндәшләре капкасына чак кына туп керми калды. Ә икенче таймда инде алар бер-бер артлы дүрт җавапсыз туп керттеләр. Нәкъ шундый исәп белән “Спартак” (район советы һәм башкарма комитеты командасы) “Газовик”тан өстен калды. Аннан “Бодрячки” Иске Матак командасы белән очрашуда 3:0 исәбе белән җиңеп чыкты.

Нәтиҗәдә Әсхәт Шәйхетдинов истәлегенә үткәрелүче турнирда “Бодрячки” командасы җиңүче булып калды да. Икенче урында – “Спартак”, өченче урынны “Газовик” командасы яулады.

“Газовик” командасында уйнаучыларга призлы урын алу икеләтә шатлык булды. Заманында район газ хезмәте коллективы белән Әсхәт Шәйхетдинов җитәкчелек иткән иде бит. Дөрес, ул елларда әле районда бер генә метр да газүткәргеч булмый. Халыкны Әлмәт шәһәреннән балоннарда сыек газ ташып тәэмин иткән заман иде ул. Бүген инде районыбыз тулысы белән табигый газдан файдалана.

Газ эксплуатацияләү коллективында үзләренең элекке җитәкчеләре Әсхәт Шәйхетдиновны бүген дә бик җылы искә алалар. Һәм менә коллективның спорт сөюче егетләре үзләре өчен бик кадерле кубокка ия булдылар.

Дамир Шәйхетдинов ярышларда катнашкан барлык командаларга ихлас рәхмәтләрен җиткерде, дипломнар, акчалата призлар тапшырды, диелә район хәбәрендә.

 


Безгә Telegramда язылыгыз

Әгәр хата күрсәгез, текстны билгеләгез һәм Ctrl + Enter төймәләренә басыгыз

Фикерләр




Бик мөһим һәм кызыклы хәлнең шаһиты булдыгызмы? Редакциягә хәбәр итегез!

+7 927 037-91-10