ҺАВА ТОРЫШЫ -1 oC

Яңалыклар

барлык хәбәрләр Татарстан Россия

Дин

Урта Азия мигрантлары хаҗны Россия Федерациясе квотасы буенча кыла алачак

22 февраль 2017, 11:09

Урта Азия мигрантлары хаҗны Россия Федерациясе квотасы буенча кыла алачак Квота буенча мигрантлардан якынча 200-400 кеше бара алачак, дип җиткергән мөфти Равил Гайнетдин.

(Казан, 22 февраль, “Татар-информ”). Россия мөфтиләр Шурасы Согуд Гарәбстаны хакимиятеннән Урта Азия хезмәт мигрантларына Россия Федерациясе квотасы (20,5 мең урын тәшкил итә) буенча хаҗ кылырга рөхсәт бирүләрен сораган. Бу хакта РИА “Новости” хәбәр итә.

“Согуд Гарәбстаны корольлеге Европа илләренә билгеле бер ташламалы шартлар бирә. Ягъни Европага килгән хезмәт мигрантлары анда яши һәм эшли, хаҗга виза ала. Шулай итеп, алар үзләре яшәгән илдәге кешеләр белән беррәттән хаҗ кылу хокукына ия. Без дә үзебезнең хезмәт мигрантларына квоталар бирергә әзер. Бу күп өлеш тәшкил итмәсә дә, аларның моңа хокукы бар”, - дигән Россия Федерациясе мөселманнары Диния Нәзарәте, Россия мөфтиләр Шурасы рәисе Мөфти шәех Равил Гайнетдин.

Квота буенча мигрантлардан якынча 200-400 кеше бара алачак, дип җиткергән мөфти. Россия мөфтиләр Шурасы Согуд Гарәбстанының уңай җавабына өмет итә.

Равил Гайнетдин сүз хаҗ турында гына түгел, ә кече хаҗ – гомрә турында да бара дип белдергән. Аны зур хаҗдан аермалы буларак ел дәвамында кылырга мөмкин. Россия мөфтиләр Шурасы башлыгы хезмәт мигрантларын иң беренче чиратта шул кызыксындыра дип саный.

Мәскәү мөфтие Илдар Галәветдинов хаҗга башкалада эшләүче мигрантларның “бик зур проценты” бара алачак дип саный. Бу мәсьәләне ул бик әһәмиятле дип атаган.

“Үзбәкстан, Таҗикстаннан хаҗга чыгып китү бик катлаулы эш, чөнки ул бик кыйммәткә төшә”, - дигән Галәветдинов.
 


Безгә Telegramда язылыгыз

Әгәр хата күрсәгез, текстны билгеләгез һәм Ctrl + Enter төймәләренә басыгыз

Фикерләр




Бик мөһим һәм кызыклы хәлнең шаһиты булдыгызмы? Редакциягә хәбәр итегез!

+7 927 037-91-10