ҺАВА ТОРЫШЫ +3 oC

Яңалыклар

барлык хәбәрләр Татарстан Россия

Авыл

Әлки районында шәхси хуҗалыклардагы терлекләрнең 36 проценты лейкоз белән авырый

28 гыйнвар 2017, 05:00

Тикшерү нәтиҗәләре электрон юл белән авыл җирлекләре советына да җибәрелә.

(Казан, 28 гыйнвар, “Татар-информ”, “Әлки хәбәрләре”). 2014 елда ук республикада лейкоз һәм аңа каршы көрәшкә багышлап зур форум үткәрелгән иде. Анда 2020 елга кадәрге чорга бурыч һәм чаралар билгеләнде. Ел саен лейкоз белән авыру очракларын 5 процентка киметү максаты куелды, дип яза Әлки районы газетасы. 

Район баш ветеринария табибы Камил Хәйруллин әйтүенчә, белгечләр  әлеге куркыныч чир белән актив көрәшәләр. 2016 елда ферма терлекләре арасында лейкозны 2,7 процентка киметә алганнар. Әмма шәхси секторда авыру терлекләр саны, киресенчә, арткан. Белгеч моны тикшерелгән сыерлар санының күбрәк булуы белән дә аңлата. 

2015 елда Әлки районы ферма һәм комплексларында асралучы 27928 баш сыерның 29,7 проценты әлеге куркыныч инфекция белән зарарланган булган. 2016 елда инде 31243 баш сыерны тикшергәннәр һәм аларның 28,7 процентында вирус табылган.

Ә шәхси хуҗалыкларда 2015 елда – 2289 баш сыерның 30,7 проценты, 2016 ел тикшерелгән 4255 баш сыерларның 36,3 проценты лейкозлы булуы ачыкланган.

– Быел бу терлекләрне гематологик алым белән тикшерәбез. Аның нәтиҗәсе буенча терлек хуҗаларына лейкоз чирле дип табылган сыерларны юкка чыгарырга кушылачак, –ди Камил Хәйруллин.

Тикшерү нәтиҗәләре терлек хуҗаларына шунда ук җиткерелә. Алай гына түгел, электрон юл белән авыл җирлекләре советына да җибәрелә.


Безгә Telegramда язылыгыз

Әгәр хата күрсәгез, текстны билгеләгез һәм Ctrl + Enter төймәләренә басыгыз

Фикерләр




Бик мөһим һәм кызыклы хәлнең шаһиты булдыгызмы? Редакциягә хәбәр итегез!

+7 927 037-91-10