ҺАВА ТОРЫШЫ -13 oC

Яңалыклар

барлык хәбәрләр Татарстан Россия

Спорт

Парагвайда "КАМАЗ"лар катнашында "Дакар" узышлары старт ала

2 гыйнвар 2017, 10:17

“КАМАЗ-Мастер” командасы данын “Дакар-2017” узышларында дүрт экипаж яклый.

(Казан, 2 гыйнвар, "Татар-информ"). Бүген, 2 гыйнварда, "Дакар" узышлары беренче тапкыр Парагвай башкаласы Асунсьон шәһәрендә старт ала, дип хәбәр итә ТАСС.

“Дакар” узышлары быел Парагвай, Аргентина һәм Боливия аша узачак һәм 14 гыйнварда Буэнос-Айреста төгәлләнәчәк.

Ралли марафоны беренче тапкыр биш категориядә үтәчәк. Трассага мотоцикллар, квадроцикллар, джиплар, йөк машиналары һәм беренче тапкыр яңа класста транпорт чаралары – багги – UTV чыгачак. Нәкъ бу класста Равил Мәганов “Поларис”та Россия экипажын җитәкләячәк.

Тулаем алганда, “Дакар” ралли-марафонына 59 илдән 316 транспорт чарасы, шул исәптән 50 йөк машинасы чыгачак, бу категориядә гадәттәгечә “Камаз-Мастер” командасы әйдәп бара.

“КАМАЗ-Мастер” командасы данын “Дакар-2017” узышларында дүрт экипаж яклый. Алар: Айрат Мәрдиев, Эдуард Николаев, Дмитрий Сотников һәм Антон Шибалов. Узган елгы ярышларда “Камаз-Мастер” командасы йөк машиналары зачетында беренчелекне Нидерландтан “Ивеко” машиналарында узышкан Герард де Ройга биргән иде.

“Дакар” ярышларында Россия командасы 13 тапкыр җиңде, аларның 7се хәзер “Камаз-Мастер” командасын җитәкләүче Владимир Чагин экипажы исәбенә кертелгән.

Хәзер чыгыш ясаячак Эдуард Николаев 2013 елда, Айрат Мәрдиев 2015 елда беренче килгән иде, 2014 елда җиңгән Андрей Каргинов “Африка Эко Рейс” ралли марафонында катнашачак.

"Париж-Дакар" ралли марафоны беренче тапкыр 1978 елда үткәрелгән.


Безгә Telegramда язылыгыз

Әгәр хата күрсәгез, текстны билгеләгез һәм Ctrl + Enter төймәләренә басыгыз

Фикерләр




Бик мөһим һәм кызыклы хәлнең шаһиты булдыгызмы? Редакциягә хәбәр итегез!

+7 927 037-91-10