ҺАВА ТОРЫШЫ +1 oC

Яңалыклар

барлык хәбәрләр Татарстан Россия

Җәмгыять

Балтачта “Абунәчеләр көне” үткән

10 декабрь 2016, 04:00

Аны район газетасы оештырган.

(Казан, 10 декабрь, "Татар-информ", "Хезмәт", Гөлзидә Газизуллина). 2017 елның беренче яртыеллыгы өчен район газетасына язылырга өч атна вакыт калып бара. Шул уңайдан редакция коллективы абунәчеләр өчен зур бәйрәм ясады, дип яза “Хезмәт” сайты.

Вакытлы матбугатка язылу чорында ел саен абунәчеләребез өчен мондый бәйрәм ясау матур гадәткә кереп китте. Балтачлылар бүген “Хезмәт” газетасына язылудан тыш, төрле призларга, бүләкләргә дә ия булды.

Абунәчеләрбез бәйрәм башланганын зарыгып көтте, алдан килеп көтеп торучылар да аз түгел иде. Иң беренчеләрдән булып Балтач бистәсендә яшәүче Хәлимә Габделхакова район газетасына язылып, бүләкле булды. Хәлимә апа гомере буе почтада эшләп вакытлы матбугат арасында кайнаган кеше. 32 ел хезмәт стажының 25 елын хат ташучы булып эшләгән. Күпме гаиләне район газетасы белән сөендергән. Лаеклы ялга чыкканчы җиде ел почтага килгән газета-журналларны аеру бүлекчәсендә хезмәт куйган.

– Үземне белә башлаганнан район газетасын алдырам. Төнлә йокы кермәгәндә дә, кулыма “Хезмәт” алам. Сәламәтлекләребез булып әле озак еллар район газетасын алдырырга, куанып-шатланып укырга язсын, – диде Хәлимә апа.

“Хезмәт” күпләрнең яраткан газетасы булып тора. Моны чарага килүчеләр тагын бер кат раслады.

– Мин елдагыча “Абунәчеләр көне” н көтеп алам, – дип сүзгә кушылды Балтачта яшәүче Гөлсинә Җиһаншина. – Быел да бәйрәм булуын ишетү белән бирегә ашыктым. Газетаны көтеп алабыз, гаиләбез белән укыйбыз. Сезгә бары тик бер теләгем бар: гади халык турында язмалар күбрәк дөнья күрсен иде.

– “Хезмәт” район газетасы, шуңа да ул район тарихын яктыртырга тиеш. Мин аңлыйм, замана белән таләпләр дә үзгәрә. Бүген хәтта газеталар да акча эшләргә тиеш. Мин бер генә дә сез, начар эшлисез димим, таләп булгач үтәлергә тиеш, әмма гади халык өчен эчтәлекле, бер сулышта укыла торган язмалар кирәк, – дип кыю фикерләрен ирештерде заманында үзәк китапханә мөдире булып эшләгән Мөнирә Хәбибуллина.

Мөнирә ханым елның-елында үзе генә язылып калмыйча, якын кешеләрен дә “Хезмәт”ле итә. “Абунәчеләр көне”ндә ул бистәнең Комсомол урамында яшәүче абыйсы Илдар Нигъмәтҗановка 2017 елның беренче яртыеллыгы өчен “Хезмәт”кә язылды.

– Элегрәк елларда берничә кешегә туган көннәренә махсус атап “Хезмәт”кә языла идем. Гомер бәйрәменә менә дигән зур бүләк, – ди Мөнирә Хәбибуллина.

“Абунәчеләр көне” бүләкләргә дә, изге теләкләргә дә бик бай булды. 2017 елның беренче яртыеллыгы өчен матбугатка язылу моның белән генә тәмамланмый, ул 28нче декабрьгә кадәр дәвам итәчәк.


Безгә Telegramда язылыгыз

Әгәр хата күрсәгез, текстны билгеләгез һәм Ctrl + Enter төймәләренә басыгыз

Фикерләр




Бик мөһим һәм кызыклы хәлнең шаһиты булдыгызмы? Редакциягә хәбәр итегез!

+7 927 037-91-10