ҺАВА ТОРЫШЫ +2 oC

Яңалыклар

барлык хәбәрләр Татарстан Россия

Җәмгыять

Чүпрәледә инвалидлар декадасы кысаларында күп төрле чаралар уза

9 декабрь 2016, 22:00

Районда физик мөмкинлекләре чикләнгән 2620 кеше яши, шуларның 90ы – балалар.

(Казан, 9 декабрь, “Татар-информ”, “Туган як”, Гөлия Фәизова). Ел саен районда физик мөмкинлекләре чикләнгән кешеләргә, аларның тормыш-көнкүрешләренә игътибарны юнәлтү максатыннан 1-10 декабрь инвалидлар декадасы кысаларында күп төрле чаралар уза. Бу хакта “Туган як” газетасы яза.

Быел да әлеге күркәм традиция дәвам итеп, балалар һәм яшүсмерләр спорт мәктәбе, яшьләр эшләре буенча спорт һәм туризм бүлеге белән бергә “Кайгырту” халыкка социаль ярдәм күрсәтү, район мәдәният бүлеге хезмәткәрләре зур бәйрәм бүләк иттеләр. Аеруча, балалар өчен күңелле әлеге очрашулар, ел дәвамында бергә интернет аша аралышып яшәгән дуслар өчен кабат күрешү мөмкинлеге дә әле бу.

Бәйрәм чарасы балалар һәм яшүсмерләр спорт залында Спартакиада ярышлары белән башланып китте.Чара белән берлектә район мәдәният йорты фойесында физик мөмкинлекләре чикле кешеләрнең кул эшләнмәләре әйберләреннән хәйрия сату-күргәзәмәсе оештырылган иде. Әлеге игелекле эштә социаль яклау хезмәткәрләре белән берлектә район мәгариф бүлеге тарафыннан да зур өлеш кертелүен искәртеп үтәргә кирәк.

- Балалар өчен менә дигән бәйрәм. Ата-аналарның балалары белән күңелле көн үткәрү мөмкинлеге дә бу. Рәхәтләнеп күңел ачтык,–ди Иске Чүпрәледән улы белән бәйрәмгә килгән Гүзәлия Насретдинова.

-Ел саен катнашабыз әлеге бәйрәмдә. Быелгысы да бик күңелле булды,-ди Яңа Ишледән Айнур Нуретдиновның әнисе. Айнур үзе дә ел саен бәйрәмгә буш кул белән килми, быел да ул иҗат фестиваленә татарча бию әзерләп килгән иде.

Көчле рухлы, батыр җанлы, тормыш авырлыкларына бирешмәүче кешеләр бергә җыелганда район мәдәният йорты да нурга күмелде. Бу нур әйтерсең әлеге кешеләрнең йөрәк җылысы. Бәйрәмгә балалары белән килгән әти-әниләрнең эчкерсезлеге, сабырлыгына карап сокланасың. Һәркайсы үз нарасые өчен җан атып, көч биреп торды. Район халкын социаль яклау бүлеге начальнигы Антонина Хәлилова бәйрәмгә килүчеләрнең һәркайсына исәнлек, шатлыклы көннәр теләп, бүләкләр һәм Грамоталар тапшырды.

Спартакиада ярышлары да, фестиваль дә һәркемнең күңелендә бары тик җылы хисләр генә калдырды. Әлеге көн һәммәбезгә һәр сабыйның балачагы бәхетле булырга тиешлеген искә төшереп торды кебек.


Безгә Telegramда язылыгыз

Әгәр хата күрсәгез, текстны билгеләгез һәм Ctrl + Enter төймәләренә басыгыз

Фикерләр




Бик мөһим һәм кызыклы хәлнең шаһиты булдыгызмы? Редакциягә хәбәр итегез!

+7 927 037-91-10