ҺАВА ТОРЫШЫ +6 oC

Яңалыклар

барлык хәбәрләр Татарстан Россия

Җәмгыять

Чаллыда балаларның өйләреннән качып китү очраклары арткан

27 октябрь 2016, 19:09

Былтыр балигълык яшенә җитмәгән 44 бала сукбайлыкка киткән булса, быел аларның саны 47гә җиткән.

(Яр Чаллы, 27 октябрь, “Татар-информ”, “Шәһри Чаллы”). Быел Яр Чаллы шәһәрендә балаларның өйләрен ташлап чыгып китү очраклары арткан. Аерым алганда, былтыр балигълык яшенә җитмәгән 44 бала сукбайлыкка киткән булса, быел аларның саны 47гә җиткән. Шунысы аяныч: аларның күбесенең өйләреннән берничә тапкыр китеп югала торган гадәте бар икән. Сәбәбе: әти-әни арасында туган аңлашылмаучанлык һәм беренче мәхәббәт газабы, дип җәмгыятьнең әлеге мәсьәләгә игътибарын юнәлтә “Шәһри Чаллы” газетасы.

Чаллы шәһәре Эчке эшләр идарәсенең балигъ булмаган балалар белән эшләү бүлеге җитәкчесе Римма Искәндәрова сүзләренчә, өйләреннән киткән балалар баштагы мәлдә дусларында куналар. Барыр урын тапмаган очракта подъездларда йоклаудан да тартынмыйлар. “Кайчак кешеләр, кызганып, үз фатирларында да кундыралар. Бала уйламыйча эш итә, ә әти-әниләр кайгырып, аларны эзли. Шуңа да барлык шәһәрдәшләребезгә мөрәҗәгать итәсе килә: әгәр фатирыгызда чит бала, ягъни улыгыз яки кызыгызның дусты кунып кала икән, бу хакта аның әти-әнисенә шалтыратып хәбәр итегез. Полициягә дә әйтергә була. Үпкә хисе корбаны булып, яшьләр нинди фаҗигаләргә юлыга аласын аңлап җиткермиләр. Шуңа да аларны аяныч хәлләрдән саклап калырга кирәк”, – дип мөрәҗәгать итә хокук саклау органы вәкиле.


Безгә Telegramда язылыгыз

Әгәр хата күрсәгез, текстны билгеләгез һәм Ctrl + Enter төймәләренә басыгыз

Фикерләр




Бик мөһим һәм кызыклы хәлнең шаһиты булдыгызмы? Редакциягә хәбәр итегез!

+7 927 037-91-10