ҺАВА ТОРЫШЫ +15 oC

Яңалыклар

барлык хәбәрләр Татарстан Россия

Авыл

Татарстанда шәхси хуҗалыкларында сыер асраучыларга 3000, кәҗәгә 1000 сум акча бирелә

25 август 2016, 11:24

Әлеге финанс ярдәме савым сыерларының, ана кәҗәләрнең һәм бер яшьтән олырак булган кәҗә бәтиләренең баш санын саклап калу өчен күрсәтелә

(Казан, 25 август, “Татар-информ”). Республиканың авыл халкы быел да савым сыерларын асрауга дәүләт ярдәме алачак. Татарстан Республикасы Министрлар Кабинеты 2016 елның 13 августында бу хакта 1718-р номерлы тиешле күрсәтмә кабул итте. Бу хакта Татарстан Авыл хуҗалыгы һәм азык-төлек министрлыгы матбугат хезмәте хәбәр итә.

Субсидияләр бер баш савым сыерына – 3000 сум, бер баш ана кәҗәгә һәм бер яшьтән олырак булган кәҗә бәтиенә 1000 сум исәбеннән каралган.

Субсидиләр алу өчен шәхси ярдәмче хуҗалыклары булган гражданнарга шәһәр һәм авыл җирлекләренең башкарма комитетларына субсидияләр бирү турында гариза тапшырырга кирәк. Гаризада почта адресы, сыерлар, ана кәҗәләр һәм бер яшьтән олырак булган кәҗә бәтиләре саны, субсидияне күчерү рәвешләре (банк счетына күчеререгә яисә түләү ведомосте буенча шәхсән кулга алырга – мөрәҗәгать итүченең теләге буенча) һәм 2016 елның 31 декабренә кадәр әлеге хайваннарның баш санын киметмәү буенча гарантияләр күрсәтелергә тиеш.

Әлеге финанс ярдәме савым сыерларының, ана кәҗәләрнең һәм бер яшьтән олырак булган кәҗә бәтиләренең баш санын саклап калу, терлекчелек продукциясен җитештерүне арттыру, шулай ук халыкның эш белән тәэмин ителешен һәм керемен арттыру максатында күрсәтелә.

(Гөлшат Ганиева әзерләде).


Безгә Telegramда язылыгыз

Әгәр хата күрсәгез, текстны билгеләгез һәм Ctrl + Enter төймәләренә басыгыз

Фикерләр




Бик мөһим һәм кызыклы хәлнең шаһиты булдыгызмы? Редакциягә хәбәр итегез!

+7 927 037-91-10