ҺАВА ТОРЫШЫ +22 oC

Яңалыклар

барлык хәбәрләр Татарстан Россия
МӨҺим
Алма-Атада көчле җил мәчет гөмбәзенә зыян китергән
Чаллыда кызның аяк табанын өздергән трамвай йөртүче эшсез калдырмауларын сорады
Зәй юл хәрәкәте иминлеге дәүләт инспекциясенә яңа җитәкче билгеләнде
Казанда Дөнья чемпионаты җанатарларын стадионга 15 шаттл йөртәчәк
Сессиядә туган телләрне укыту турында закон проектын карауны тәкъдим итәчәкбез – Р.Вәлиев

Мәдәният

Азнакайлылар “Йолдызлык” фестиваленнән яңа җиңүләр белән кайтты

25 апрель 2018, 02:00 , Фото: aznakaevo-rt.ru

Азнакайлылар “Йолдызлык” фестиваленнән яңа җиңүләр белән кайтты “Бәхет” вокаль ансамбле беренче дәрәҗә лауреат исемен яулады.

(Азнакай, 25 апрель, “Татар-информ”, “Маяк”, Наилә Тенишева). “Созвездие-Йолдызлык” республика фестиваленең менә тагын бер сезоны төгәлләнде. Азнакай балалар сәнгать мәктәбе педагогларына, укучыларына һәм әти-әниләргә бик күп дулкынлангыч мизгелләр бүләк итте ул, дип хәбәр итә район газетасы.

Әлеге конкурс республиканың шәһәрләре һәм районнарыннан сәләтле балаларны җыя. Безнең укучылар да эстрада сәнгатенең төрле жанрларында үз көчләрен сынадылар, тамашачы мәхәббәтен казандылар, яңа иҗатташ дуслар таптылар.

“Йолдызлык”та ел саен яңа йолдызлар кабына. Быел да азнакайлылар фестивальдә зур уңыш казандылар. Татарстанның атказанган мәдәният хезмәткәре Эльвира Шәйхуллина җитәкчелегендәге “Фантазия” вокаль ансабленең кече составы беренче тапкыр гына чыгыш ясаса да, суперфиналда икенче дәрәҗә лауреат исемен алды. Ә нини йолдызчык Чулпан Шаһиева тагын жюри йөрәген яулап, өченче урынга лаек булды.

“Бәхет” вокаль ансамбле беренче дәрәҗә лауреат исемен яулады. Быелдан башлап “Созвездие-Йолдызлык” фестивале ЮНЕСКО эшләре буенча Россия Федерациясе Комиссиясе канаты астында үткәрелә. Сәләтле балаларны үстерүгә керткән өлеше өчен әлеге Комиссиянең беренче югары бүләген ансамбль җитәкчесе, Татарстанның атказанган мәдәният хезмәткәре Наилә Шәрифуллина алды.

Миләүшә Зарифуллина җитәкчелегендәге “Балачак” хореографик коллективы өчен дә фестиваль яхшы нәтиҗәләр бирде – коллективка Татарстанның җыр һәм бию ансамбле баш балетмейстеры, Татарстан Республикасының халык артисты Раилә Гарипова милли традицияләрне саклаган өчен махсус приз тапшырды.

Быелгы сезонда фестивальдә Азнакай балалар сәнгать мәктәбеннән 125 укучы һәм 9 педагог катнашты.

“Юлдаш” вокаль ансамбле (җитәкчесе Татарстанның атказанган мәдәният хезмәткәре Фирдәвес Әхмәтгалиева), Алина Сафина, Руслан Латыйфуллин (җитәкчеләре Наилә Шәрифуллина), “Фантазия” вокаль ансамбленең зурлар составы (җитәкчесе Эльвира Шәйхуллина), “Огоньки” (җитәкчесе Лилия Миңнеханова) һәм “Лилия” (җитәкчесе Лилия Закирова) хореографик коллективлары катлаулы иҗади бәйгедә дипломант булдылар, диелгән район хәбәрендә.

 


Безгә Telegramда язылыгыз

Әгәр хата күрсәгез, текстны билгеләгез һәм Ctrl + Enter төймәләренә басыгыз

Фикерләр




Бик мөһим һәм кызыклы хәлнең шаһиты булдыгызмы? Редакциягә хәбәр итегез!

+7 927 037-91-10