ҺАВА ТОРЫШЫ -1 oC

Яңалыклар

барлык хәбәрләр Татарстан Россия
МӨҺим
Татар теле олимпиадасына Гарәп Әмирлекләреннән килгән Ибраһим А.Гыйләҗевтан өзек сөйләячәк
22 апрельнең төп вакыйгалары - фото һәм сылтамалар
Татар теле олимпиадасында катнашучы төрек кызы телне гаиләдә сакларга кирәк дип саный
Татар теленнән олимпиаданың узган елгы җиңүчесе быел ярышка япон егетен килергә үгетләгән
Татар теленнән халыкара олимпиадада катнашучылар өчен 20 төрле бирем җыелмасы әзерләнгән

Мәдәният

Дәүләт камера хоры Кыпчак кызлары җырына клип төшергән

11 декабрь 2017, 16:43

Дәүләт камера хоры Кыпчак кызлары җырына клип төшергән Әлеге клип Камера хорының яңа проекты – чит ил һәм татар хитлары миксын тәшкил иткән “Алтын граммофон” программасының беренче этабы.

(Казан, 11 декабрь, «Татар-информ», Рузилә Мөхәммәтова). Татарстан Дәүләт камера хоры Dj Ислам Вәлиев һәм Gauga төркеме солисты, музыкант Оскар Юнысов белән бергә А.П.Бородинның “Князь Игорь” операсыннан Кыпчак кызлары җырына музыкаль клип төшергән. Татарстан Дәүләт камера хорының сәнгать җитәкчесе Миләүшә Тәминдарова бу проектны “музыкаль параллельләрдә һәм музыкаль перпендикулярларда эшләү” дип атый.

“Европа юнәлеше алган коллективыбыз өчен бу проектның милли булуы да мине бик сөендерә, - ди Миләүшә Тәминдарова. – Без анда Бородинны җырласак та, ул бик милли. Проект минем Ислам Вәлиев белән дуслыгымнан башланды. Аннары Оскар Юнысов проектка кушылды. Әлеге егетләрне миңа “Казанның төнге мэры” дип аталучы продюсер һәм эшмәкәр Артур Хосровян тәкъдим итте. Кыскасы, минем әллә кайчаннан уйлап йөргәнем көтмәгәндә тиз генә тормышка ашты да куйды”.

“Миңа гадәти урында төшерелгән клип кызык түгел иде, яки гипс мәгарәсе, вокзал, почтамт, аэропорт кирәк иде. Без аэропортны сайладык. Нәтиҗәдә, менә шундый “шашкан” проект килеп чыкты”, - дип дәвам итә ул.

Әлеге клип Камера хорының яңа проекты – чит ил һәм татар хитлары миксын тәшкил иткән “Алтын граммофон” программасының беренче этабы. Концерт 22 декабрьдә Салих Сәйдәшев исемендәге Зур концертлар залында үтәчәк.

Миләүшә Тәминдарова клипның заманча продуктка сусаган татар музыкаль культурасы өчен әһәмиятле проект булуына басым ясый. “Ул татар җыр сәнгатенең югарылыгын да күрсәтә”, - ди ул.

Мәгълүмат өчен. Татарстан Дәүләт камера хоры рәсми рәвештә 2007 елда оеша. Аның нигезендә Казан дәүләт консерваториясенең Опера студиясе хоры тора. Сәнгать җитәкчесе – Татарстанның атказанган артисты Миләүшә Тәминдарова.
 


Безгә Telegramда язылыгыз

Әгәр хата күрсәгез, текстны билгеләгез һәм Ctrl + Enter төймәләренә басыгыз

Фикерләр




Бик мөһим һәм кызыклы хәлнең шаһиты булдыгызмы? Редакциягә хәбәр итегез!

+7 927 037-91-10