ҺАВА ТОРЫШЫ -5 oC

Яңалыклар

барлык хәбәрләр Татарстан Россия
МӨҺим
"Казан утларының" иске редакторы яңасына уңыш теләде
Данил Салихов алты хатын-кызга Татарстан Язучылар берлеге таныклыгы тапшырды
Татарстан чаңгычысы Анна Морковкина Төмәндә узган ярышта икенче булды
Авыл тормышын яктырткан әдәби әсәрләр конкурсына йомгак ясалды - исемлек
Дүрт татар язучысына дүрт әдәби премия тапшырылды - исемлек

Татар дөньясы

Краснодарда Нардуган бәйрәме аша мәктәп укучылары милли мәдәният белән танышкан

30 ноябрь 2017, 19:41

Краснодарда Нардуган бәйрәме аша мәктәп укучылары милли мәдәният белән танышкан Бәйрәмдә катнашучыларда башка милли йолаларга да кызыксыну уянган.

(Казан, 30 ноябрь, “Татар-информ”, Алмаз Шиһабетдинов). 25-26 ноябрь көннәрендә Краснодар краеның “Болгар-К” татар җәмгыятенең яшьләр үзәге мәктәп укучылары өчен Нардуган бәйрәмен уздырган. Бу хакта “Татар-информ” хәбәрчесенә шул җәмгыять әгъзасы Илнур Нурмиев хәбәр итте.

Беренче көннән үк мәктәп укучыларын берничә сорау борчыган: “Нәрсә ул Нардуган?”, “Бу сүз нинди мәгънәгә ия?” һәм “Татар авылында без нишләячәкбез?”. Оештыручыларның сүзләренчә, Нардуган бәйрәмендә катнашкан күп кенә укучылар татар мәдәнияте, теле белән таныш булмаган яки үз милләте турында аз мәгълүмат белгән.

Бәйрәм гадәттә 22-23 декабрьдә “Кояш туган” вакытта уздырылса да, “Болгар-К” җәмгыяте аны вакытыннан алда оештырган. “Нардуган”ның максаты – яшь буынга татар йолаларын, гореф-гадәтләрен җиткерү, аларга мәхәббәт уяту. Бәйрәмдә барлыгы 24 мәктәп укучысы катнашкан.

Бу ике көн аралыгында катнашучылар татар телендә курчак спектакльләре куйганнар. Спектакль кую балаларга бик ошаган, чөнки монда алар, әкият геройлары ярдәмендә, яңа татар сүзләрен өйрәнә алган.

Нардуган кысаларында күп кенә остаханәләр дә эшләгән. Наталия Кулиш татар мәдәнияте тарихы турында сөйләгән, Гөлнур Абдулова өчпочмак пешерү серләренә өйрәткән, Римма Колотова түбәтәйләрне ничек итеп ясаганнарын аңлаткан, ә Динара Ибраһимова һәм Мәрьям Магасумова дөрес һәм матур итеп яулык бәйләргә өйрәткән.

“Нардуган”ның соңгы көнендә катнашучылар өчен кече Сабантуй уздырылган. Монда катнашучылар милли уеннар белән таныша һәм истәлекле бүләкләр ота алганнар.

Оештыручылар Нардуганны киләсе елга да уздырырга телиләр. Алай гына да түгел, бу бәйрәмнән соң яшь буында башка бәйрәмнәргә дә кызыксыну туган, шуңа күрә Нардуган белән берлектә татар халкының башка милли бәйрәмнәре дә уздырылачак.

 


Безгә Telegramда язылыгыз

Әгәр хата күрсәгез, текстны билгеләгез һәм Ctrl + Enter төймәләренә басыгыз

Фикерләр