ҺАВА ТОРЫШЫ -5 oC

Яңалыклар

барлык хәбәрләр Татарстан Россия
МӨҺим
Казанда "Татарстанның спорт өметләре" премиясен тапшыру тантанасы узды
Татарстан табигате энциклопедиясе өчен галимнәр 5 үзенчәлекле карта төзегән
Казан Кыш бабайлары һәм Кар кызлары үз хезмәтләренә бәяне арттырган
Хельсинки Җәмигъ мәчете төзүдән баш тарткан
Татарстан табигате энциклопедиясенә кимендә 5 мең тираж кирәк – галимнәр

Мәдәният

Кәрим Тинчурин театры Германиягә китте

17 ноябрь 2017, 14:04

Кәрим Тинчурин театры Германиягә китте 18 ноябрьдә татар артистлары Германия тамашачысына "Назлы кияү" спектаклен күрсәтәчәк.

(Казан, 17 ноябрь, “Татар-информ”, Мөршидә Кыямова). Бүген, 17 ноябрьдә, К.Тинчурин исемендәге Татар дәүләт драма һәм комедия театры Германиягә гастрольгә китте. Бу хакта “Татар-информ” мәгълүмат агентлыгы хәбәрчесенә К.Тинчурин исемендәге театрының матбугат хезмәтеннән хәбәр иттеләр.

Әлеге иҗади сәфәр татар театрына нигез салучыларның берсе – күренекле драматург, актер һәм режиссер К.Тинчуринның тууына 130 ел тулу уңаеннан оештырыла. Иртәгә, 18 ноябрьдә, коллектив Россия Федерациясенең Бонн шәһәрендәге Генераль консуллыгында бөек драматург әсәре буенча куелган иң күңелле спектакльләрнең берсен – шаян рухлы “Назлы кияү” музыкаль комедиясен күрсәтәчәк. Сәфәр кысаларында Лейпциг шәһәрендә милләттәшләребез белән иҗади очрашу да күздә тотыла. Шул уңайдан артистлар махсус концерт программасы әзерләде. Труппа Казанга 20 ноябрьдә әйләнеп кайтачак.

Исегезгә төшереп узабыз, Тинчурин театрының иҗаты республикада гына түгел, Татарстаннан читтә яшәүче тамашачылар арасында да зур кызыксыну уята. Казанга кунакка килгән татар диаспоралары вәкилләре театр спектакльләрен күргәннән соң, үз төбәкләрендә гомер итүче милләттәшләребез белән тинчуринлыларны даими очраштыра килә. Коллективның Россия төбәкләре буйлап оештырылган даими гастрольләре моның ачык мисалы булып тора. Моннан тыш, Тинчурин театры соңгы елларда чит ил сәхнәләрендә дә зур уңыш белән чыгыш ясый. Әйтик, Кәрим Тинчуринның “Сүнгән йолдызлар”, Нәкый Исәнбәтнең “Хуҗа Насретдин”, Мирсәй Әмирнең “Гөлшаян” спектакльләре Төркиянең төрле шәһәрләрендә күрсәтелде. 2012 елда тинчуринлылар Бельгиянең Брюссель һәм Брюгге шәһәрләрендә татарның бөек шагыйре Габдулла Тукай әсәрләренә нигезләнеп сәхнәләштерелгән “Сөй гомерне!” шигъри драмасын тәкъдим итте. Спектакльне әлеге ил халкы гына түгел, ә күрше Франция һәм Германиядән дә милләттәшләребез килеп карый алды. 2016 елда исә коллектив Финляндия башкаласында “Сөй гомерне!” һәм “Без – кырык беренче ел балалары” әдәби спектакльләрен уйнады.

Быел исә Тинчурин театры, соңгы еллардагы күркәм традицияне дәвам итеп, Германиядә чыгыш ясаячак. Әлеге зур проект Германиядәге татар диаспорасы вәкилләре тәкъдиме һәм Татарстан Республикасы җитәкчелеге, Татарстан Республикасы Мәдәният министрлыгы ярдәме белән тормышка ашырыла.


Безгә Telegramда язылыгыз

Әгәр хата күрсәгез, текстны билгеләгез һәм Ctrl + Enter төймәләренә басыгыз

Фикерләр