ҺАВА ТОРЫШЫ +14 oC

Яңалыклар

барлык хәбәрләр Татарстан Россия
МӨҺим
16 августның төп вакыйгалары - фото һәм сылтамалар
Татар телле радиолар арасындагы пляж волейболында икенче ел рәттән Татарстан радиосы җиңде
Коткаручылар Алабуганың Криуша елгасында баткан ир-атның гәүдәсен тапкан
"Ак Барс" хоккейчылары Ригада уза торган турнирда икенче тапкыр оттырды
Синоптиклар республиканың аерым районнарында томан төшәчәген фаразлый

Авыл

Апас игенчеләре төнлә дә эшлиләр

12 август 2017, 00:00

Апас игенчеләре төнлә дә эшлиләр Горбунов берләшмәсендә урып-җыю эшләре тәүлек әйләнәсе бара. Көндез теземнәргә салган игеннәрне, төнлә суктырып амбарларга ташыйлар.

(Апас, 12 август, “Татар-⁠⁠⁠информ”, “Йолдыз”, Гүзәл Хилавиева). Апас игенчеләре төнлә дә эшлиләр. Горбунов берләшмәсендә урып-җыю эшләре тәүлек әйләнәсе бара. Көндез теземнәргә салган игеннәрне, төнлә суктырып амбарларга ташыйлар, дип яза район газетасы.

Төнге уникедән соң Дәүләки бүлекчәсе кырларында кызу эш кайный. Сигез комбайн суктыра, дүрт КамАЗ ташып тора. Янгын сүндерү машинасы кизү тора.Багыштан Илнур Хәмидуллин җәйге каникул көннәрендә туган як басу-кырларына эшкә кайткан.

– Нефтехимия колледжында укыйм. Урып-җыю эшләрендә катнашып, хуҗалыкка хезмәтем белән файда китерсәм, үземә акчасы да була. Төнлә белән мин, көндез Фиргать Әхмәдуллин эшли, - ди студент егет. Марсель Сәлахов та дүртенче сезон кыр корабын иярли.

– Мин төнге сменада гына эшлим. Көндез ял иткәч бер дә авыр түгел. Көзге бодай уңышы җыябыз. Машиналар бертуктаусыз ташып торалар. Икмәк чыгышы да бик әйбәт, 15-16 бункер тутырабыз, - ди Марсель. Караборнаш авылыннан Илдүс абый Шәмсиев гомере буе шофер. Без үткән чакрымнарны санап-исәпләп тә бетерерлек түгел. Быел менә төнге сменада, амбарларга ташыйбыз, - диде ул.
Аннан соң Дәүләки бүлекчәсенең ындыр табагына юл алдык. Биредә төн димәссең, бөтен җирдә ут яна, икмәк эшкәртү эшләре бара, КамАЗлар бер-бер артлы кайтып кына тора. Фазыл абый Сәләхетдинов безне ындыр буйлап ияртеп йөреп эш барышы белән таныштырды.

– Егерме дүрт сәгать монда мин. Хезмәткәрләр ике сменага бүленгән, кайткан икмәкне үлчәп, сортларга аерып, чәчүлеккә, пай җирләренә халыкка бирер өчен дип бүлеп, амбарларга сала барабыз. Бүгенге көнгә 600 центнер чәчүлеккә, 500 центнер халыкка бирергә дип салдык. Икмәк әйбәт булгач сөенә-сөенә эшлибез, - ди ару-талуны белмәс Фазыл абый.

Уңган һәм тырыш игенчеләребезгә уңышлар, армый эшләүләрен теләп калабыз, диелгән район хәбәрендә.

 


Безгә Telegramда язылыгыз

Әгәр хата күрсәгез, текстны билгеләгез һәм Ctrl + Enter төймәләренә басыгыз

Фикерләр