ҺАВА ТОРЫШЫ -1 oC

Яңалыклар

барлык хәбәрләр Татарстан Россия
МӨҺим
"Рубин" Тулада "Арсенал" белән тигез исәпкә уйнады
Губкин исемендәге университетта укучы татар студентлары милли мәдәният көнен бәйрәм итте
18 ноябрьнең төп вакыйгалары - фото һәм сылтамалар
Альбина Шаһиморатова әтисенең концертында катнашу өчен Казанга махсус кайтты
"Зенит" волейбол командасының Чемпионнар лигасында көндәшләре билгеле булды

Мәдәният

Азнакайда Әзһәр Шакиров һәм Нәҗибә Ихсанова кунак булып китте

15 февраль 2017, 23:00

Азнакайда Әзһәр Шакиров һәм Нәҗибә Ихсанова кунак булып китте Аларның һәр кайтуы туган якларында зур бәйрәмгә әверелә.

(Азнакай, 15 февраль, “Татар-информ”, “Маяк”, Резеда Шәрипова). Азнакайда Әзһәр Шакиров һәм Нәҗибә Ихсанова кунак булып китте. Театр сәнгате күгендә якты йолдыз булып янучы Татарстанның һәм Россиянең халык артистлары Әзһәр Шакиров һәм Нәҗибә Ихсанова белән азнакайлылар чын-чынлап горурлана. Аларның һәр кайтуы туган якларында зур бәйрәмгә әверелә, дип яза районның “Маяк” газетасы.



Мәртәбәле кунакларны муниципаль район башлыгы Марсель Шәйдуллин кабул итте. Ул аларга изге теләкләрен җиткереп, районыбызның югалган авыллары тарихына багышланган китап бүләк итте, Нәҗибә ханымның иңнәренә мамык ак шәл япты.

Әлеге китап аларның икесе өчен дә бик кадерле, чөнки канат чыгарган Яңа Ташлыяр авылы инде җир йөзендә юк. Районыбызда андый авылларны барлау буенча зур эш башкарылды. Ике бөек артистны биргән Яңа Ташлыярда исә зиратларны чистартып, стеллалар да булдырылды.

– Игътибарыгыз өчен бик зур рәхмәт, һәрчак сизеп-тоеп торабыз. Азнакайны да югары күтәрдегез. Авыр һәм җаваплы эшегездә уңышлар юлдаш булсын, – диде Нәҗибә Ихсанова район башлыгына.

Күренекле якташларыбыз төбәкне өйрәнү музеенда экспонатлар белән танышканда яланаяклы балачакларына әйләнеп кайткандай булдылар.

– Кара, бусы нәкъ безнең авылныкы кебек бит! – дия-дия, һәр почмакта истәлекләргә уралдылар.

Биредә икесенең дә сәхнә костюмнары саклана. Нәҗибә Ихсанованың “Зәңгәр шәл” спектакленә альяпкычын кызы Әлфия үз куллары белән чиккән булган.

Музей хезмәткәрләре 7 нче мәктәп укучылары белән очрашу да әзерләгән иде.

Үземнең язмышыма рәхмәтләмен. Ялан тәпи Әзһәр белән җитәкләшеп, Мәскәүгә чыгып киттек. Тырышып белем алдык, максатыбызга ирештек. 55 ел бергә театрда эшләдек.

Гомергә дуслар булдык. Дуслыкның, тормышның кадерен белеп яшәгез, авырлык очраса, бер дә курыкмагыз! Туган телне, сүзне, халыкны яратыгыз, – диде Нәҗибә Ихсанова укучыларга.

– Азнакайга кайткан саен, мондагы матур үзгәрешләргә күңелем сөенә, зур горурлык хисләре кичерәм. Боларны күрә алуым белән бәхетлемен. Сезнең күңелләрдә дә горурлык булсын, – диде Әзһәр Шакиров.

Нәҗибә апа белән олпат язучы Туфан абый Миңнуллиның кызы Әлфия Юнысова музейга әнисенең портретын һәм “Әлдермештән Әлмәндәр” спекталендә уйнаган чулпыларын бүләк итте.

Мәдәни үзәктә хөрмәтле кунакларны “Җанашым” фольклор ансамбле ишек катыннан ук җырлап каршы алды. Нәҗибә апа белән Әзһәр абыйны уртага алып биеттеләр дә хәтта. Сәхнәне үзешчәннәребез, Азнакай халык театры чыгышлары бизәде. Кунаклар залдагы мәдәният хезмәткәрләренә сәнгатьне яратулары өчен рәхмәтләрен, изге теләкләрен җиткерделәр.

Үзләре белем алган Буралы авылы да аларны киң кочак җәеп каршылады. Монда туганнары, сыйныфташлары, дуслары, шулай ук җыр-моңнары белән авылның “Сердәш” ансамбле, тальянчылар көтеп тора иде.

Сыйныфташы Минназия Ситдикова Әзһәр абыйга чиккән кулъяулык бүләк итте.

– Җиденчене бетергәнче бергә укыдык. Яңа Ташлыярга кунакка да барып йөри идем. Егерме хуҗалыклы авылда алар кечкенәдән концертлар куеп, халыкның күңелен күреп яшәделәр. Икесе дә бик әйбәт укыдылар, тәртипле булдылар. Чалпыга урта белем алырга киткәч, юлларыбыз аерылды, – ди ул.

Кунакларны кыңгыраулы атларда урам әйләндереп килделәр.

– Буралының таркалмавын телим. Монда каз өмәләре, башка төрле бәйрәмнәр күп уза, укып-ишетеп торам. Туган ягымда шундый сәләтле, булдыклы кешеләр булуына сөенәм, – дип, Әзһәр абый кичерешләре белән уртаклашты, якташларына китабын бүләк итте.

Аннан соң юл Чубар Абдул мәктәбенә барып тоташты. Очрашуга Чалпы авылыннан да килгәннәр иде. Алар да күренекле үз укучыларын онытмыйлар, һәрчак ихтирам белән искә алалар. Мәктәп музеен, укучылар чыгышын карап, халыкның сорауларына җавап биреп, үз күңелләренә дә илһам һәм ял алды Әзһәр абый белән Нәҗибә апа бу көнне, диелә район хәбәрендә.

 


Безгә Telegramда язылыгыз

Әгәр хата күрсәгез, текстны билгеләгез һәм Ctrl + Enter төймәләренә басыгыз

Фикерләр