ҺАВА ТОРЫШЫ -1 oC

Яңалыклар

барлык хәбәрләр Татарстан Россия
МӨҺим
"Рубин" Тулада "Арсенал" белән тигез исәпкә уйнады
Губкин исемендәге университетта укучы татар студентлары милли мәдәният көнен бәйрәм итте
18 ноябрьнең төп вакыйгалары - фото һәм сылтамалар
Альбина Шаһиморатова әтисенең концертында катнашу өчен Казанга махсус кайтты
"Зенит" волейбол командасының Чемпионнар лигасында көндәшләре билгеле булды

Мәдәният

Расих Ханнанов иҗаты татар белән башкорт арасында шигъри күпер булды – шагыйрьнең кызы

12 декабрь 2016, 13:23

Расих Ханнанов иҗаты татар белән башкорт арасында шигъри күпер булды – шагыйрьнең кызы Мәскәүнең татар мәдәнияте үзәгендә шагыйрь, журналист Расих Ханнановның 85 яшьлегенә багышланган “Җырлы гомер” дигән кичә узды.

 (Мәскәү, 12 декабрь, «Татар-информ», Александр Долгов). Мәскәүнең татар һәм башкорт җәмәгатьчелеге шагыйрь һәм журналист Расих Ханнановның 85 яшьлек юбилеена багышланган «Җырлы гомер” концертына җыелды. Кичәдә Уфадан композитор Рим Хәсәнов, танылган Мәскәү җырчылары Роза Хәбибуллина, Наилә Фатехова чыгыш ясады.

«Җырлы гомер» тамашасын Наилә Фатехова берничә көн элек кенә Расих Ханнанов сүзләренә иҗат иткән «Өн һәм төш» җыры белән башлап җибәрде. Әлеге яңа җырны Мәскәү татарлары яратып кабул итеп, җырчыны алкышларга күмделәр. Алга таба кичәне Роза Хәбибуллина, Рим Хәсәнов, «Татар моңы» конкурсы лауреаты Илнара Нигъмәтуллина дәвам иттеләр.

Авыру сәбәпле, Расих Ханнанов Мәскәүдә узган юбилеенда катнаша алмады. Кызы, Башкортстанның Россия президенты каршындагы вәкаләтле вәкиллегенең матбугат үзәге җитәкчесе Гөлчәчәк Ханнанова сүзләренчә, Мәскәүдәге татар һәм башкортларның аның иҗатын олылап, кичәгә җыелулары әтисен бик дулкынландырган.

“Әтинең иҗаты ике халык һәм республика арасында күпер булды. Үзе Уфада яшәсә дә, аның җырларын Татарстанда да җырладылар. Аның юбилеенда татар һәм башкорт иҗат коллективларының күпләп катнашуы юкка түгел бит”, - диде Гөлчәчәк Ханнанова.

Татарстанның Россия вәкаләтле вәкиленең урынбасары Азат Әхтәриев та Расих Ханнановка башышланган кичәне татар-башкорт дуслыгының үрнәге итеп бәяләде. Аның сүзләренчә, Расих Ханнанов иҗатына Мәскәү татарлары да битараф түгел.

Ә менә композитор Рим Хәсәнов Расих Ханнанов Халык шагыйре исеменә лаек дип саный. “Ул төрле җанрларда эшли. Аның шигърияте белән 20 ел элек танышып, хәйран калган идем. Чөнки аның иҗаты – бөек иҗат. Ләкин исем алу өчен аның артыннан йөрергә кирәк», - диде «Татар-информ» агентлыгына Рим Хәсәнов.

Кичәдә чыгыш ясаган Татарстанның атказанган артисты Роза Хәбибуллина фикеренчә, Расих Ханнанов татар җыр сәнгатенә зур өлеш керткән иҗатчы. Авторның «Ялгыз аккош күлләрдә”, “Әткәй”, “Һич онытма” һәм башка җырларын халык яратып башкара.

«Җырлы гомер» концертында татар һәм башкорт коллективлары да зур уңыш белән чыгыш ясадылар. Шулай ук Мәскәүнең “Газиз” татар театр студиясе Расих Ханнановның “Теге дөнья, бу дөнья» пьесасыннан өзек күрсәтте.

Расих Ханнанов 1931 елда Башкортстанның Кырмыскалы районында туып үсә. Озак еллар «Кызыл таң» газетасын җитәкли. 27 китап авторы.

 


Безгә Telegramда язылыгыз

Әгәр хата күрсәгез, текстны билгеләгез һәм Ctrl + Enter төймәләренә басыгыз

Фикерләр